N Korea-i benokba onük benoka olemteptsü mulunga lir: Seoul

Seoul, August 26 (Agencies): North Korea-i par linük anema benokba tenokdangba sentong agientsü asoshi benokba onük benoka olemteptsü asoshi mulunga aliba osang ka S Korea-i tanü Bodbar nü metetdaktsüogo.

Pyongyang-i taoba mapang, 2010 nung Seoul’er tzüyim mitkartem amakba sülen par linük anema tenokdangba benokba osang bushiteta lir.

Aji oda, par linük anati meraratsü tezüngzüktep agir anogo ka lir külen, Seoul-i tanü iba osangji metetdaktsür lir.

Pyongyang-i landmine pokdakja S Korea mitkar züngsem 2 tashi yiruja tensa mejungi kümdaktsüba atema taidok meshiba ajanga par linük anati meraratsü tezüngzüktep agitsü lenmang sadema lapoktsü aser iba tezüngzüktepji agiba sülen par linük ana tsüngda tesendaktep tajungba kümdaktsütsü nükjidong nung Seoul-i Pyongyang den jembiteptsü senden maneni amentsü asoshi terenemshiba agiba osanga jangjaogo.

“Ozü linük anati jembitepba senden amentsü tenzükba sülen Pyongyang-i 2010 küm May ita 24 nü atalokba tatalokba den sentakba onük benoktsü akok aser ozü linüki kasaji jembitepba ajanga bentettsü terenemshiba agia lir,” ta S Korea’er Unification Ministry otongdar, Jeong Joon-hee-i metetdaktsü.

N Korea’er tzüyim mitkartemi torpedo bomb ka kalokja Seoul navy mitkar züngsem 46 tashi tepsetba sülen Seoul-i May 24, 2010 nung raliwalitsüren, shishilembatsü aser Pyongyang nem teyari agütsübaren ajunga nokdangba osang bushiteta lir.

Ajisüaka, S Korea mitkartem tepsetba maparen nung par linüki shilem agia mali ta shia, par linük ana tsüngda jembitepba senden amenba jakdang par linük anema benokba tenokdangba sentongji agientsü asoshi Pyongyang-i takhangba benoka lir.