Central NPF teyari medeni Rio’er telok marakzütettsü

Kohima, October 25 (TYO): Naga People’s Front (NPF) Central Youth Wing-i anogo asembuba State Assembly Speaker anema lungkak aitogo.
Tanü Rajya Sabha MP aser NPF Secretary General, K G Kenye-i lungkak aitba sentong nung aden aser pai ashiba agi, Neiphiu Rio aser TR Zeliang nati aniba NPF teloki NPF nem anogo 7 tsüngda parnok den puteptsü mapang latettsübaji kanga dang temenünütsüka lir.
“Parnoki NPF party dang parnok den putepang ta ashitsü tashi kecha mali, saka Dr Shurhozelie-i aniba NPF ajanga dang puteptsü temsüa lir ta ajitetra, party nungi agienba aser anenja aliba NPF MLA 36 aser Rio’er telok meyipa anioktsü tashi lir” ta K G Kenye-i ashi.
Parnoki telok anema mapa inyak aser iba jagi parnok züngsem agien mesüra anenja lir. Anungji NPF-i dang parnok den putepshitsü mesüra meputeptsü telemtetba agitsü, ta paisa shisem.
October 17, 2017 nü Election Commission of India nung putepshiba indang shia mali saka NPF dang obang meputepa aliba onük angatetteptsü atema General Convention ka jazüka telemtetba agitsü tetuyuba agütsü, ta Kenye-isa metetdaktsü.
NPF-i General Convention jazüka agiba sülen chief whip aser disqualification indang ken o tem bentettsü, ajisüaka tang ozüng alema tenteta aliba sorkaribo item ken o mangadaktsütsü atema okadak anogotem apulokyonga dang aotsü, ta paisa ashi.
Election Commission of India (ECI) ji linük nung yimten telok ajak asoshi len anir aser akhüm agütsür ka lir, anungji Rio aser TR Zeliang teloki parnok manishitettsü. ECI-i NPF indang constitution kanga junga meteta aser Nagaland nung tang ajuruba tensa angateta lir. Iba jagiang NPF dang General Convention jazüktsü aser tebilemtsü angatetteptsü tetuyuba agütsü, ta Rajya Sabha MP-isa metetdaktsü.
Chief Whip inyaktsü atema Yitachu aser NPF legislature party lennir inyaktsü atema Kuzholuzo Nienu na shimbaji party nung president ajanga shim aser iba ya okadak mashii ka nung agizüktsü, ta paisa ashi.
NLA Speaker, Dr. Imtiwapang Aier-i tekaratiba nung pa tsüngdang benoka aliba ken o tem atema temeden agütsütsüla, ta Kenye-isa shisem.
NPF Chief Whip, MLA Yitachu-ia o jembidang “NPF Youth Wing-i lungkak aitba sentongji ozüng alema tenteta aliba sorkari ozüng alema mapa inyaksangshiba anendaktsütsü atema lir” ta ashi.
“NPF-i tang NPF MLA 10 aliba atema dang masü saka telok tangaba nung aliba MLA tem ajak asoshi temedentem atema rarar” ta paisa shisem.
“Rio aser Zeliang teloki parnok telok tuluba ta ashir süra, kechiba parnoki Dr. Shurhozelie aser telok dang parnok den putepshitsü aser adentsü jaoker? Dr. Shurhozelie telok maden nungbo parnok tejakleni moutettsü ta Rio aser Zeliang teloki meteta lir” ta Yitachu-isa ashi.
MLA Thongwang-ia NLA Speaker dang India Linük temzüng nung aliba ama pa mapa timi inyaktsü takhangba agütsü.
Anema apusoba teloki khuret tuluba bener arutsüdang NPF tashitaitba akümtsü. Party züngsemtem masetshii nokdaktsüla kechiyong taruba election nung NPF wangshitsü, ta Phongwang-isa ayongzük.
NLA Speaker ji ken o tem bendena dangbo meyutettsü saka tang mesüra yasür pai item ken o tem atema telemtetba agitsüsa akümtsü, ta MLA, R Tohanba-ia o jembidang ashi.
“TR Zeliang indang whip jiang shitak asü süra kechiba Speaker-i TR’er Whip anema vote agütsüba MLA 10 disqualify masü?” ta Tohanba-isa asüngdang.