Clean Election shirnok atema, aser koba state atema ?

– N. Saku Imsong,  4th Mile, Diphupar Dmr.

Hai adianutem aser senso tajungtem, NBCC aser ABAM ajanga küm aika tejaklen nungi election merüka agitsü asoshi ayimtena aru. Saka nüburtem den Tsüngremi mejembiba ajanga küm aika asen lima tashiyim agi election agia aruogo. Saka 2016 kodang LKM mongdang Tuli nung liasü, Tsüngremi lenirtem molungjang nung ajungshia TARUBA ELECTION 2018 nungjibo nisungi molungba nung masü, saka Tsüngrem pelatsüsa CLEAN ELECTION ta ayongzüktsü pangzüng ka renema ajaki joko mapa tamajung inyakba agi lakteter asüba agi ya terajem tajung ta angateta akangakanga ajaki molonga agizüka ayu.
Iba sülen tesem ajaklen ayimsünga oa meta ajaklen ayimsünga Naga lima nübur ajaki pelaseta pei pei tesem nung mapa inyakdar nee. Ashitsü agi, ya nisunger sentong masü, saka Tsüngrem adenba sentong ka ta angateta kümkümshiangnee ta ajungshir.
Saka asenoki kodang clean election ojang ya junga züngdangdir ojang (13) keta lir. Anungji Luke 10:27 nung ashi amaji, lanurtem, nü temolung ajak agi, nü tanela ajak agi, aser nü tashi ajak agi asenok tang putu, aser nenok tarutsü putu ayipjanga aotsüsa teraksar aliyongbo tatsüngzüknee ta ayimoktsür ati. Ibai nisungi puratetba sentong masü, saka Tsüngremer mapangtong ta angateta züngkümshiangnee.
Hai, ano tekümdangtsü ka shitikor, asenok yamai belemseta inyakyongkela karbo nunga nunga amai tesem ajaklen nungi temesepba chiyongtsü yi tapu ajak check mesütetba garitem nung Nagaland tonger ketdangsürtemia mesotteti store tayudak maka kanga kangshiteper ta osang angashidarji aji shidak asü ochiar memetet. Anungji itemjibo asen lima clean election pusemertem masütsü. Party Convention nunga sen alemba otsüsa angashi. Parnok yanglutsü mechi nung lenmang meyanglur, aputem meyanglur o tako ashiyonga aremzüker, saka asenok senbo odang election atema rizünga alitsüa shibai metet. Saka ya shinür temelenshiba lima nung shiba südir süang, sen alemtsüdang bilemba yimsüsür aser lanu putu raksatsütsü bilemba yimsüsürtembo atangji Tsüngremi atakatemtsü ta meteta manisadaktsütsü temulungtetba nung ochi nangri kanger iba tongpang akoktsü asoshi sen masü, nür lanu putu asoshi inyakang. Onoki shisatsü aser sarasadem agi nungittsü akodang, Bal tsüngdang mapudakba nübu jenti tabensa tangatetba bener nenok den lirgo tetsüremnee ta ayimoktsür. Ya lanurtem dang khuret masü saka yi aser temesepba nokdangtsüjibo watsülartemi ajaklen khuret aben nunga tajungba südisü ta tebilemba lemsateper.
Kuknalim.