Champhai district nung nisung ka shirem-i tepset

Aizwal, October 26 (Agencies): Mizoram-Myanmar arrtsülen Champhai district kübok Kawlbem yimtsüng anasa arem ka nung arishi küm 55 tain tebur ka shirem kati tepsetogo, ta police temi metetdaktsüba osang angazükogo.
Police sangdong ka ajanga ashiba agi, Thangchhuana ya Kawlbem yimtsüng nung Government High School nung Grade IV employee ka liasü, aser pa shirem kati amak. Shirem yagi pa amakba sülen pai prangbong agi shirem dak akha, aser iba sülen shirem ya jena oadok. Osang ajanga ashiba agi, shirem dena sür lia ngutetogo.
Prangbong akhaba ola angazüka Thangchhuana’er medemertem pa kümzüki aru, aser parnoki pa kanga mejungi yirur ali nung mepidaka angu.
Iba sülen parnoki Thangchhuana yimdaki anir toguba mapang nung pa lendang süadok.
Mapang tatsüka lir külen yimdaklirtemi pa indang prangbong tebushi aoba mapang nung parnoki shirem ya prangboba ngutetba tesem nungi tatsüka pilaa or sür lia ngutet.