Temeshiba bushiba

Rongsen tulu dang nungi tenüng tajungang shimtettsüla.  – Apijemtsü Shin 22:1
Italy nunger Charles Ponzi yagi küm aika nüburtem dang teyazü küli agi sen meshitener tetemlok amshia ochi mashi mapa inyaka aru. Mapang tatsüka nung sen tetemlok aika rena Charles-i item sen tajangzükji amshia par mapa tulu aika inyak aser paa molamoshia ngasangatema ali. 1920 küm pai aibelenba putetdangbo sen million aika sentsüh kümer liasü aser bank 5 tashi nung item sentsühtem agütsütsü mokoki aküm. Pa küm 3 tepuokdak liasü aser 1949 küm pa küm 66 asüdang pa ket nung senjang kata melii asü.
Apijemtsü Shin kaket nung shisa akaba aser shisa makaba nisungtem indang aika shia lir: “Ochishir büemtetbaji temoatsü ka; saka tamashi tenüngji shizüka aotsü” (A.Shin 10:7-9). Solomon-i iba Lai O yamai rajemtsür, “Rongsen tulu dang nungi tenüng tajung ang shimtettsüla; Hon aser Taribi dang nungi maongka tajungba”. (22: 1)
Asenoki tenüng tajungji aginür, asenok konang asoshi masü saka Kibuba Khrista shiba tenüng ajak madak tematiba lir, Pa tenüng ajungkettsü atema.
Sarasadem : Tenüng tajung katetba taküm akümtsü ni yariang. Amen.