WhatsApp nung ‘Delete For Everyone’ feature alitsü

October 27, 2017 (Agencies): WhatsApp nung nisungtemi kanga yongya ataba feature, koba ajanga aibelena yokba message tanaben meyiba agiteter, iba ya mapang talangka melie amshitettsü, ta osang ajanga ashi. WhatsApp nung ‘Delete for everyone’ feature ya aibelena mesüra mükemdangi ojang, noksa, voice message, GIF, location, contacts, olong aser status nung reply asüba amala atema lir. Osang ajanga ashiba agi iba ‘Delete for everyone’ feature ya meilongi dang mapa küma inyaktsü aser iba atema noksa text mesüra media balala yoker aser agizüker anaprong indang WhatsApp nung iba version tasenba ya update süa alitsüla.
Message yokba ya teyokeri meyiba agiba sülen WhatsApp ajanga iba ‘unintentional message’ indang ‘fake copy’ ka yoktsü. Kodang iba ‘fake/false copy’ ya nisung ka indang WhatsApp tongtir, ‘chat history’ nung iva ya save masütsü aser device ajanga kasa ya meyiba magütsütsü. Message indang ‘false copy’ ajanga database nung kasa ID reprangtsü. Iba ID ngutetba sülen message yua aliba ID ya tanaben meyiba agitsü. Saka iba ‘Delete for everyone’ feature ya message mesüra media ajunga nungbo mamshitettsü. Aser itemji:
– Quoted message telung nung aliba message den tanaben meyiba magitettsü.
– Delete for everyone ya Broadcast List nungbo mamshitettsü.
– Message ya yoker minute 7 sülen bo meyiba magitettsü. Delete for everyone ya message yoker minute 7 tsüngta dang mapa inyaktsü.
– Delete for everyone ya symbian OS nungbo mamshitettsü.
WhatsApp amshirtemi iba updated version ya ata alitsüla. Iba version activate asüba message mongura whatsApp ya khen uninstall sür tanaben install asütsüla. Saka uninstall masüdang chat data tem backup süa ayutsüla.