Gujarat election atema PM Modi-i nübo yimtsütsü

Gandhinagar (Gujarat), October 27 (Agencies): Ato kilonser, Narendra Modi-i Gujarat assembly election atema nübo yimtsüba ajanga party-i takok tulu angutsü ta party nung inyakertemi imlar.
Taküm December ita nung Gujarat assembly election agitsü lia Ato kilonser, Modi-i election nüboyim senden 50 nung nübo yimja jembitsü, ta BJP lenirtemi metetdaktsü.
Osang ka ajanga, “South Gujarat, Saurashtra, Kutch aser Central Gujarat nung Modi-i lokti senden 50-70 shi nung jembitsü. November 10 sülen Ato kilonseri nüboyim tenzüktsüa akok. Iba anogo nung pai state tesem balala nung lokti senden 3-4 nung jembitsü,” ta metetdaktsü.
Taküm election agitsü lia Ato kilonseri par state (Gujarat) 10 ben shi semdangogo, aser ibaji ajanga Gujarat election ya BJP aser Modi atema ‘akhümket tongbang’ ka lir temaitsü sayur.
2014 küm Modi-i Gujarat yimtenren toktsüba mapang nungi tenzüka state nung BJP nungi takotet lenir kata madoker.
“Tamasabo BJP-i Gujarat nung nüboyim senden 15-18 shi dang ayongzüktsü sentong liasü, ajisüaka tangbo party-i Modi dang tajemba agi nüboyim senden 50 nungbo jembitsüla aser road show nung shilem agitsüla ta mepishiogo,” ta BJP osang ajangasa metetdaktsü.
Gujarat election atema Modi aser BJP Tir, Amit Shah na dak alia Uttar Pradesh chief minister, Yogi Adityanath-ia nübo yimtsütsü sentong lir.