Meghalaya CM-i BJP lennir Alphons-i jembiba o apur

Shillong, October 27 (Agencies): Meghalaya nung elections agitsü mapang tonga aruba mapang, Chief Minister Dr Mukul Sangma-i nübor sen achi ta BJP-i aitsüba anema Congress-ia o kar meyiptsüogo.
Chief Minister Mukul Sangma-i nübor sen auyazüka agi ta Union Tourism Minister K.J. Alphons-i ashi saka Mukul-i iba ken o ji ozüng ajanga dang lemtettsü ta shiogo.
“Iba ama tai tongloktsüba ken o ya ozüng amertemi tendangtsüla. Pai ‘nübortem indang sen auyazüka agi’ ta ashibaji kechi shinürba?” ta Meghalaya chief minister-isa asüngdang.
Alphons ya Brihostibarnü Sohra nung public sentong ka nung aden aser pai idakji sangküm assembly elections atema BJP atema nüboyima o jembi.
“Mukul-i Meghalaya state aser idaki alirtem dang tiyazü tenangzükbatem agi. Pai mapa aika inyaktsütsü ta ashi saka pai nübortem indang sen ang auya saka iba amaji inyaka moudaktsütsü” ta Alphons-i osangbenertem dang ashi.
Bharatiya Janata Party-ibo nübortem dang nangzükba ama inyaker, ta Union Minister-isa shisem.
“Prime Minister Narendra Modi-i kanga dang junga lenisüa arudar aser pai sensakertem dak rangloker mapa inyaker” ta Alphons-isa metetdaktsü.
“Meghalaya nung alirtemi education aginür, lanurtem asoshi maongkatem aginür aser item ajakji ochimashi maliba sorkar ka aliba ajanga dang inyaktettsü. Ibaji BJP sorkar kümtet nungdang ataloktsü” ta paisa shisem.
“Meghalaya ya topur tajung lima ka lir aser tourism atema lenmang aika lir, saka nisung shingaia marur kechiyong nüngdakba infrastructure mali. Ibaji ochishia inyakba sorkar kati dang yanglutettsü” ta Alphons-isa metetdaktsü.
“Congress-i Meghalaya nungertem külakokja arur aser sorkar melentsübaji kanga nüngdak. BJP nem maongka agütsüra, onoki ochishia sorkar ketdangsütsü aser nübortem ajungkettsü atema inyaktsü” ta paisa ashi.
BJP ji Khristantem anemba telok ta jembiba atema Alphons-isa ashiba agi, Modi-i India nung Khristantem kanga kümzüker aser pai maneni kümzüktsü.
“Nisung aikati kü dang na Khristan ka saka kechiba iba party nung adener ta asüngdanger. Nisungtem kü dang jashi. Modi-i sorkar kümtettsü tashi ngura, tenlakitem rongdoktsütsü aser samatsütsü. Khristantem züka merenshi ta ashi” ta Alphons-isa shisem.
“Modi Prime minister akümba sülen tesüiba küm asem ser tesadang tsüngda India nung tenlaki ka danga rongdoktsü mesüra samatsü asü? BJP sorkari tenlaki ka nungdanga mesotak. India nung Khristan ka dak danga teka sangshi asü? Mesangshi” ta Union minister-isa ashi.