Muslim tsür kati Khristan den kibong akümba atema ashishiteper

Thiruvananthapuram, October 29 (Agencies): Taoba hopta Kerala kübok Muslim tsür kati Khristan ka den kibong akümba atema ashishitep ken o ka adoka lir. Ajisüaka, kibong anatsüprongi mulungtepa tena kibong akümba lir.
Nisung shingaia tamangba yimsü meyipba ken o kecha madok, saka Jaseela village nung mahal committee-i iba kiyimba sentong nung deden ta tetuyuba ka agütsüba ajanga ashishitep ken o ji adok.
Parnokisa Jaseela (tetsürla)’er kibong den tesentaktep malitsü atema teuyuba agütsü. Mahal ji mosque ka telongtet nung aliba tesem dang ajar.
Iba jagi Kondiparamba mahal nung alirtem teimba kati kiyir benjung nungji maden aser Jaseela’er kibong den o jembitsü nungnangteper.
“Iba ya lokti nungi züngdokba ama lir. Mahal committee-i parnok tashi sayunür. Ozü nem mamatzü, osangkaket agütsürtem aser dokan kiburtemi kechi inyaktsü? Parnoki tsübuba agi ozü den tesentaktep malitsü aser tatem nung ozü iba tesem toktsür aotsüsa akümtsü. Tia kaa, iba kiyong adena orr aliba tanga mahal nung alirtemi onok arua liang ta ashir” ta Jaseela tetsü Najma-i osangbener dang ashi.
Ajisüaka, mahal committee-i lokti nungi züngdokba masü ta ashir.
“Mahal committee dak tashi kar lir. Kiyir benjung agiba indang osang tejangja shidaktsütsü atema onoki Jaseela tebu Yusuf jaok saka pa maru” ta mahal committee president Abdul Salam-i ashi.
“Iba jagi onoki par kibong den tesentaktep malitsü lemtet, saka onoki par kibongji mezüngdok” ta paisa shisem.
Jaseela aser Tiso Tommy na kiyimbaji October 19 nü Malappuram nung aliba Nilambur Sub Registrar Office nung Special Marriage Act kübok register asü. Iba sülen anogo ana lir reception ayonga agi.
Muslim tsür kati tangar ka den kibong akümba agi Kondiparamba mahal committee-i kanga dang aritepa October 18 nü sanen luden senden ka amen.
Senden nung Jaseela’er kibong nokdangtsü lemtet. Iba osangji mosque indang public address system ajanga metetdaktsü.
Ajisüaka, Najma-i ashiba agi lar kibong nembo iba osang ano magütsü lir. “Onoki shidiji anguba sülen okadak benoka tokteptsü. Mahal committee-i ozü kibong züngdoktsü tashi mali” ta laisa shisem.
Yusuf pa mapa nung kanga mazüngba agi mahal committee pur den majuruteptet, ta Najma-isa metetdaktsü.
Yusuf ya Malappuram nung Kerala Water Authority nung assistant executive engineer inyaker.
Jaseela kibong akümtsüba indang osangji parnoki mahal committee dang mashi kechiyong parnoki memulungtsü liasü, ta laisa ashi.
“Tena küm tenet tejakdang Coimbatore nung külemi inyakdang meimtep. Tena tang Gulf nung lir. Onoki tena nokdangyonga, tena kibong akümtsübasa liasü, aji agi onoki tena nungittsü lemtet” ta Jaseela tetsüisa shisem.