Sikkim CM-i Centre dang Karmapa nem Sikkim semdangdaktsütsü asoshi mepishi

Gangtok, November 2 (Agencies): Sikkim Chief Minister Pawan Kumar Chamling-i Centre dang Tibet nunger tamangba yimsü lenir Karmapa Ugen Trinley Dorje-i Sikkim semdangtsü asoshi temelaba agüjang, ta mepishi.
Trinley, ya Tibetan Buddhism, Karma Kagyu School tekolakba lir, pa 17buba Karmapa Lama title angutsü asoshi temsüa lir aser Rumtek monastery tekolakba dena akümtsü.
Karmapa ya Tibet nung 1985 küm aso aser Nepal ajanga India-i jena aru. Pa Himachal Pradesh, McLeod Ganj nung Tibetan exile quarters January 5, 2000 küm tonga aru.
“Ni Centre tang 17buba Karmapa nem Rumtek monastery aser Sikkim nung Karma Kagyu tesem nung tang Tibetan Buddhist lokti semdang daktsütsü asoshi mepeshia arudar, saka amajok nung dang lir,” ta pai ashi. Iba olen ya pai North Sikkim district, Phodong tesem nung taruba panchayat election atema nübuyimba sentong ka nung ashi.
“Tibet nunger tamangba yimsü lenir India nungbo litettsü, saka Sikkim semdangtsü asoshibo Centre-i memelar. Karmapa-i kechiba Sikkim mesemdangtettsü?” ta pai asüngdang.
Chamling ya linük nung Chief Minister tem rongnung talangtiba inyaksang lir. Pai ashiba agi, pai January, 2016 küm Ato Kilonser Narendra Modi-i Sikkim semdangba mapang, kechiba Karmapa nem Sikkim semdangtsü asoshi temelaba magütsür, ta asüngdangogo aser maneni pai Delhi November 7 nü semdangba mapang nunga kasaji asüngdangtsü, ta ashia.