Gavin Williamson UK defence secretary shim

London, November 02 (Agencies): Sir Michael Fallon-i menden azüngtsüba sülen Chief Whip Gavin Williamson ya United Kingdom indang defence secretary shimogo.
Taoba mapang yimya shidak maliba ajanga UK mitkar nung telokakba asütsü metemsü, ta shir Sir Michael ya Bodhbarnü mapa toktsü.
Parliament nung tetsür anema tashishitsü o jembiba ken o tawa temai adokba sülen Sir Michael ya yimden yimsüsür rongnungi mezüngbuba mapa toktsür kümogo.
Williamson ya pa indang former deputy Julian Smith-i melenzüka chief whip akümer.
Smith-i Commons nung telok balala yimya achayanga reprangtsü aser pa teyarir ya Tatton MP aser taoba mapang GMTV presenter Esther McVey asütsü.
Tang iba ama tensa tamajung ka nung UK Ato Kelonser May-i la indang chief whip amshitsü lemtetba ya nisung aika atema taoksatsüka lir, ta BBC assistant political editor Norman Smith-i ashi.
Saka lai iba ama inyakba ajanga mangatettep madoktsü aser 22 November Budget matongdang menden ajunga melentsü, ya pai shisem.
Gavin Williamson ya mitkar mapa inyakdanga aliba nübu ka masü aser pai kodanga secretary of state meinyakdang. Saka pa ya lanur ka lira ser Number 10-i temulung alemba nisung ka lir.
Tensa tamajung ka nung pa Ministry of Defence-i aru. Defence tsütsü sen ajemba kümzüktsü asoshi pai mezüng inyaktsü. Cabinet Office ya tang defence aser security review asüba mapang ka lir aser iba osang ya küm tatemi agütsütsü.
Ministry of Defence nung budget ajemdakja lir, saka anu sen billion £20 dak tali ajemtsüla lir.
UK indang mitkartem nung agütsüba itasen timba kümtsütsüla, ta jembiba mapang ka lir. UK nung mitkartem tasen shimba aser tang teinyakdak alirtem maneni inyakdaktsütsü indang maparen nunga tebilemtsü adoka lir aser yimden yimsüsürtemi mitkar tali shimtsü atsüayonger.
Islamic State tem den raraba anu metembangi lir aser Gavin Williamson-i RAF tayimtsü amshia amakba reprangtsü. Mitkartem mesüra Ministry of Defence nung nisung aikati Williamson ya memetet aser international jenjang nunga pa meteter aika mali.