India nung shishilembatsü tang kanga temelaba kümogo: PM Modi

New Delhi, November 03 (Agencies): Hokolbarnü Ato kilonser, Narendra Modi-i India nung shishilembatsü atema akhi mapang dang nungi tang kanga temelaba kümogo, ta metetdaktsü.
Yaküm ‘World Bank Ease of Doing Business index’ nung India jenjang 130buba nung liasü, ajisüaka takümbo iba list nung India temaba jenjang 100 nung densemogo, ta New Delhi nung World Food India conference nung jembidang Ato kilonser, Modi-i metetdaktsü.
India ya alima nung rongsenkettsüng jenjang kanga kera ainba linük rongnung dena lir, aser taküm July 1 nungi Goods and Services Tax (GST) benoka inyakba ajanga linük nung saru aika aliba kanga ajema kümogo, ta paisa ashi.
Ato kilonserisa alima nung aliba company balala dang, India-i arur food process industry nung sen indoka inyaktsüla, kechiyong yangi maongka aika lir, ta ayongzük.
Paisa, contract farming, raw material sourcing aser agricultural linkages nung invest asütsü nüngdaker, ta ashi.
Tawa Gujarat, Bahruch nung Congress party senden ka nung jembidang Congress tatong Tir, Rahul Gandhi-i, World Bank’s Ease of Doing Business tematiba jenjang 100 club nung India-i jenjang 30buba anguba aija liasü. Rahul-i, “Iba jagi atangji nungbo linük nung temelenshi madok. India nung shishilembatsü tezüba masü, sen notes anentsüba mesüra GST ajanga kecha tajangzük magütsü,” ta ashi.