Police mapa ya tezüba masü: DGP, LL Doungel

Dimapur, November 3 (TYO): Police mapa ya tezüba mesüra timtem melii inyakba mapa ka masü, kechiyong iba mapa inyakdang tayongzükba aika ajurur, ta tanü Nagaland DGP, LL Doungel-i ashi.
NAPTC ground nung 54 buba batch NAP/IR havildars aser constables indang attestation parade nung o jembidang, Doungel-i “department ka khen atema shibang nung, public-i timtem aika ajurutsü saka iba jagi tetsükdaktsü balakabo mangutsü. Ajisüaka, police mapa ya anogo ka mesüra ana atema dang shibangtsüsa kümra, loktiliba nung mepetmesü aser timtem jenti adoktsü” ta ashi.
Police shiai mapa inyaktsü atema tenangzükba agidang nangzükba ama mapa tajungtiba nung inyakba den tebilemtsü bena inyaktsüla, ta paisa ayongzük.
Tanü sentong nungsa DGP-i training agiyonga arudang takok balala angur nem takok marok aser kulikakettem agütsü.
Tanü pass asürtem 618 rongnung constables 615 aser havildars 3 lir. Parnok rongnung NAP nungi 316, NAP (IR) nungi 299 aser Home Guard & Civil Defence nungi asem dena lir.
Iba sentong nung Commandant, NAPTC, T Metha-i training agiba indang osang tatsüka lemsatep.