Elections magidang Naga yimten latetnür

Dimapur, November 3 (TYO): November 3, 2017 nü Chief Minister T.R.Zeliang den pai aniba DAN Cabinet züngsem ajak aser M.P. Neiphiu Rio nungertemi Union Home Minister Rajnath Singh den ajurutep.
Senden nung Chief Minister aser Cabinet züngsemtemi Rajnath dang Naga yimten tebilemtsü tekaratiba nung latettsü nüngdakba onük lemsatep.
Küm 20 tashi yimjung olemtep liyonga arur aser sangküm tetenzüklen state Assembly elections agitsü lir, anungji elections magidang Naga yimten tebilemtsü asoshi telemtetba ka agitsüla, ta TR Zeliang-ia ashi.
Prime Minister aser Union Home Minister nati kanga dang bendanga agüja aser len ania mapa inyakba angudang Naga yimten yakta latettsü ta imlar. Iba telemtetba ya Khristmas matongdang agi nung kanga ajungtsü, ta Neiphiu Rio-i Rajnath dang ashi.
Iba mapang Home Minister Rajnath-ia Chief minister aser pa den yaritepertemi tekaratiba nung telemtetba ka agitsü atema tebilemba lemsatepba pelaa agizük. Naga yimten tebilemtsü ya tekaratiba nung latettsü imlar, ta paisa shisem.
Tanü anüngdang Chief Minister den cabinet züngsemtemi Nagaland House nung Naga Peace Talks atema Interlocutor, R.N. Ravi den ajurutep.
Iba senden nunga TR Zeliang-i Ravi dang elections matongdang Naga yimten tebilemtsü atema telemtetba ka agitsüla ta mepishia metetdaktsü.
Senden nung R.N. Ravi-ia ashiba agi, tatembang telemtetba ka agitsü atema mapang tonga arudar aser telemtetba tajung ka agitsü atema sendaktepa alirtem ajaki shilem agitsüla.
Tongtipang onük teimbaka angatettepogo aser kar dang anünga lir. Anungji nisung ajaki tekaratiba nung telemtetba ka agitsü atema merangtsüla aser talisa state ajungtsü atema elections matongdang agi nung ajungtsü, ta Ravi-isa shisem.
Tanü senden nung Neiphiu Rio (MP Lok Sabha), Imkong Imchen (Minister), G. Kaito, (Minister), Tokheho Yepthomi (Minister), Y. Patton (Minister), Dr. Nicky Kire (Minister), Kipli Sangtam (Minister), E.E. Pangteang (Minister), Mmhonlumo Kikon (Minister), Kejong Chang (Minister), Neiba Kronu (Minister), Imtilemba Sangtam (Minister), S.I. Jamir (Advisor), C.M. Chang (Advisor), Pukhayi (Advisor) aser Hukavi (Advisor) nungertem liasü.