NLSF-i scholarship atema asüngdanger

Dimapur, November 4 (TYO): Union Ministry-i December 28, 2016 nü sen lakh 1344 tashi lemzükjaka kodaser mapang shitak nung utilization certificate merenemteter aser scholarship magütsür ta Nagaland Law Students’ Federation (NLSF)-i asüngdangogo.
Iba ya department-i mapa takok ngua meinyaktetba ajanga mesüra senotsü tim mesüi amshiba ajanga alitsü akok. Timi ketdang mesütetba aser ochimashi inyakyim ajanga kechiba kaketshirtem tarutsü raksatsür? Kaketshirtem indang scholarship auyazüka agitsüsa kechiba ketdangsertemi yamai nemzüka lua inyaksangshir ta parnokisa asüngdang.
Arunachal Pradesh nung chief minister, Khandu-ibo scholarship agütsüba memenudaktsütsü atema bangdak scholarship dang state senpong nungi scholarship ajunga agütsütsü tetuyuba agütsü. Centre nungi sen arutsü ta tangatetba nung paibo iba tetuyuba agütsü süra kechiba asen sorkaribo yamaiji meinyakteter. Kechiba lanurtemi nenok dak temulung alemtsüsa mapa inyaka mesayuteter. Onoki ‘breakfast’ meeting maginür saka nüjiso indang ‘picnic’ aser temetentem ang aginür, ta NLSF tir Imliben Lemtur aser tongti tezülur Medochutuo Kiewhuo nati sangdong nung shia lir.
Ketdangsertemi kaketshirtem indang taginüba metongtsür aser ola adokbatem ajak nembangtsür. Onoki jashir aser onoki ketdangsübaren nung temulung alemba samaogo. Terenlok maliba, lenmang majungba aser mapa manguba khurettem onok tenük agi angur aser Samajwadi party den mesüktepa party sasep nung obang meputep adoka bangsentepa onoki angashir. Kaketshirtem yariba aser lanurtem asoshi terenlok mapa inyaktsüba sorkar tajung ka onoki aginür, ta NLSF mendenpurtemisa ashi.
Onoki kanga junga shisadanger aser election nungji onoki kor tejen nem takok mengudaktsütsü saka onok tarutsüi len anitsü atema lanur lennirtem shimtsü, ta parnokisa shisem.
NLSF-i anogo tenetnü züngzüktsüba mapangbo süiogo saka onoki onok tajungba agi scholarship atema mapa inyakdar. Onoki RTI ajanga osang aser kuli tejangja bendentsü atema mapa inyakdar aser itemji bendenba sülen okadak benoktsü. Okadak benokba sülen aibelenertem nem tapet temerenshi agütsütsü. Asen state tensa kanga mejungi kümogo saka kobi melii ozüng benoktsü aser onoki Central & National Investigating Agencies den yariteptsü, ta NLSF-isa metetdaktsü.