Tawang tashi train lenmang yanglutsü: Sitharaman

Itanagar, November 5 (Agencies): China den arrtsüa aliba Tawang nung train lenmang yanglutsü aliba atema sen peria agütsütsü, ta Defence Minister Nirmala Sitharaman-i Arunachal Pradesh Chief Minister Pema Khandu dang ashi.
Sitharaman-isa Arunachal Pradesh nung advanced landing grounds (ALGs) civilian temia amshitsü atema lapoktsütsü ta ashi.
“ALG tem nung IAF infrastructural facility tem civilian nem-a lapoktsütsü ta defence minister-i ashi. Laisa Missamari (Assam) nungi Tawang tashi railway line yanglutsü asameyang asütsü atema sen peria agütsütsü nangzük” ta chief minister’s office sangdong ka nung metetdaktsü.
Sitharaman-i anogo ananü atema Arunachal Pradesh semdangi aru aser Honbar nü lai Dirang nung tayimtsü anendak ka yanglutsü indang tebilemba lemsatep.
Union defence minister meina Secretary (Defence), GoC-in-C (Eastern Command), GoCs of 3 & 4 Corps aser senior defence ministry ketdangsertem aru.
Chief minister Khandu-i Itanagar nung cantonment ka lapoktsü nüngdak ta ashi aser idangji Sitharaman-i iba asoshi tongti süa inyaktsü ta nangzük. Iba cantonment yanglutsü atema state sorkar ali acre 50 bushitsü tenangzükba agia liasü.
Sitharaman-isa Arunachal Pradesh nung Sainik School asem lapoktsü mulunga agizük. School temji Tawang, Pasighat aser Tirap-Changlang-Longding (TCL) tesemtem nung lapoktsü.