Guwahati civic body-i linük naklo ken atentsüba telemtetba agi

Guwahati, November 6 (Agencies): Jaipur nung municipal corporation kübok mapa inyakertem ajak anepdang linük naklo ken tener mapa tenzüktsü asoshi tetuyuba agütsüba sülen anogo ishika lir, Guwahati civic body-ia kasa tetuyuba agütsüogo.
Guwahati Municipal Corporation kübok mapa inyaker ajak anepdang shia 10:00 ako nung linük naklo ken tener mapa tenzüktsüba atema telemtetba agiogo.
Iba tetuyuba ya city Mayor Mrigen Sarania-i agütsü.
Linük naklo ken atenba ajanga mapa nung ochimeshi inyaktsü aliba nungi nokdangtsü, ta Mayor-i shi. Taoba hopta Jaipur civic body nung inyakertem ajak anepdang linük naklo ken atemtsüba aser nikongtsütsü linük ken (Vande Mataram) atentsüba atema tetuyuba agütsüogo. Yimti Mayor, Ashok Lahoty-i shirnoki iba ken metener parnok Pakistani-i oang, ta shisem.
Pakistan inoka jembiba olen angajemja Lahoty-i ashiba agi, ken metenertem Pakistan-i oa ta ashiba masü, saka kari kü dang iba ken metenera koda asütsü, ta asüngdangba nung, ni iba ya Pakistan masü, ta ang langzü.
Taoba ita Supreme Court-i Centre dang movie theatres densema lokti adenshiba tesemtem nung linük naklo ken atemtsüba achaayangtsü asoshi inyakyim tejangja ka agüjang, ta tetuyuba agütsü. SC ajanga ashiba agi, linük mimtsüba asoshi okadak nungi tetuyuba magütsütettsü, mesera nisung ka linük naklo ken atendang nokdakba ajanga pa/lai linük meimer,ta masadangtettsü.