PM Modi-i demonetisation atema tatok meshitsüla: Manmohan Singh

New Delhi, November 6 (Agencies): November 8 nü demonetisation inyakba sülen küm ka ajungba anogomung amungtsü lia taoba Prime Minister Manmohan Singh-i PM Narendra Modi aitsü.
Modi-i demonetisation inyakba ajanga loktiliba nung sensakertem aser shishilembartem takoksa tulu nguogo anungji pai tatok meshitsüla, ta Manmohan-i Hombar nü ashi.
Manmohan ya ajaki metetba economist mongin ka lir aser pai BloombergQuint sen sensaksemdang, “sorkari parnok teinyaktsütem metongshitsüla aser rongsenkettsüng yanglushitsü atema mapa inyaktsüla. Yimten mapa inyakba joko tembangogo” ta ashi.
Demonetisation ya Reserve Bank of India (RBI) reju indang temeten aser tenüng anema inyakba mapa ka lir. Iba ya ajanga tanga rejutem nunga sorkai teka ia amoshiba sayur, ta taoba prime minister-isa ashi.
“Shidi sen mamshi shishilembaba aser ozüng alema bendenba sen azüoktsü meranga mapa inyakji junger saka iba mapa ya tatem tonga inyaktsüla. Iba mapa ya amokmerena, mesüra tashiyim amshia mesüra mita aoba ajanga makoktsü kechiyong iba tangatetba jagi tetsükdaktsü ang bener arutsütsü” ta Manmohan-isa shisem.
“Cashless economy inyakyim ajanga shishilembar tilatem tuluba kümdaktsütettsü aser aika yokyayokjitettsü” ta paisa ashi.
Centre sorkari Goods and Services Tax (GST) amala inyakyim ajanga rongsenkettsüng jenjang yanglushitsü merangbaji junger saka junga meshisadangi tenzükba ajanga takoksa ang bener arutsütsü. Asenoki rongsektettsüng jenjang yanglutsü atema inyakba mapaji kanga junga shisadangba sülen ang mapa küma tenzüktsüla, ta Manmohan-isa metetdaktsü.