Hockey India-i tetsür team takok atema tenüngsang agütsü

New Delhi, November 6 (Agencies): Indian tetsür hockey team-i küm 13 lir külen Asia Cup akokba sülen parnok takok tajung atema Hockey India-i Hombarnü team aser support staff senpettsütsüba sangdongogo. Indian Women’s Team nung züngsem parnok 18 aser Chief Coach nem sen lakh kaka agütsütsü aser support staff ajak nem sen 50,000 agütsütsü, sangdongogo.
Final asaya nung India tsürtemi China team penalty shootout nung 5-4 agi akok, kong Rani Rampal-i sudden death nung goal idaktsü. Telok anaprongla 4-4 nung scor kasa aliba mapang nung Goalkeeper Savita-i kanga junga ball nokdanga parnoki asayamung akok. Iba takok ajanga India tsürtem 2018 Women’s World Cup nung shilem agitsü asoshi maongka ngutetogo.
India team-i asayamung peyong kanga junga asayaogo, kechiyong parnok iba asayamung nung khen danga tamakok mangu. Parnoki parnok dang temaba jenjang nung aliba China (World No.8) aser Japan (World No.11) dena akok. India tsürtemi asayamung peyong nung goal 28 idaktsü aser goal 5 dang achi.
“India tsürtemi küm 13 sülen Asia Cup koktetba ya tenüng asangtsü tetemsü lir. Parnoki iba asayamung akoktsü asoshi temulungtetba tulu nung asayaogo aser taruba küm World Cup atema maongka ngutetogo. Captain Rani-i anir tema ajak, support staff aser coaching staff ajak nem Hockey India-i tenüngsang agütsür. Iba takok atema onok kanga nema tanga bilemer,” ta Hockey India, Secretary General, Md. Mushtaque Ahmad-i ashi.