SASCA puri Cultural Meet-cum-pre Ahuna benjung ayongzük amung

Dimapur, November 10 (TYO): Sports and Cultural Association (SASCA) puri November 9 2017, nü Satakha Public Ground nung Cultural Meet-cum-Pre Ahuna celebration sentong ka ayongzüka kaogo. Iba sentong nung , National Highways and Political Affairs, minister, G. Kaito Aye tongti tesemdanger liasü.
Iba sentong nung denshiba atema pelaba lemsatepba den külemi Minister-i, SASCA ajanga sobaliba aser asen maitsü wazüka ayutsü nükjidong nung iba amala sentong ayongzüka akaba atema parnok nem tenüngsang agütsü. Pai ashiba agi, information technology kanga keraa ainba lima ka nung asen sobaliba kanga keraa samaa odar.
Association nungita yaritsüba nangzükba den külemi Kaito-i ashiba agi, Naga nungertem ajak atema asen sobaliba ajungkettsü asoshi sabang tajung ka nüngdaker aser ano lanurtem nem asen sobaliba aser maitsü wazüka ayutsü asoshi angatetdaktsütsüla.
Maneni pai, SASCA puri tarutsü atema bilema maparen balala ajungkettsü asoshi nükjidong yur inyakba atema parnok tenüng asangba den, parnok meketa aliba tesem aser jilatem atema asen sobaliba ajungketba aser wazüka ayuba tsütsü tatishitsü tajung ka küma, temelenshi bener aruba hadir tajung ka akümtsü asoshi ajungshi.
Iba sentong nung Hotovi Zhimo, GB, Khukiye Lukhai-i, Ahuna Saqhi agütsü, kasa mapang nung SASCA, tir Er. Kughashe Zhimo-i lokti pelaa agizükba o jembi. Benjung nung shilem ka ama sobaliba inyakyim balala nung tetoktepba agia liasü, aser takokertem nem senpet agütsü.