Minister G. Kaito jaoka Zunheboto nung Ahuna benjung among

November 14, 2017 nü Zunheboto jila nung Ahuna benjungmong sentong nung National Highways & Political Affairs Minister, G. Gaito Aye-i jembiba noksa nung angur.

Dimapur, November 15 (TYO): Zunheboto jila tenteter Platinum Jubilee amongba den külemi Zunheboto Town Platinum Jubilee organizing committee-i November 14, 2017 nü Local Ground, Zunheboto nung Sumi nungeri aluruwa sülen amongba Ahuna benjung ayongzüka liasü aser iba sentong nung tongti tesemdangerji National Highways & Political Affairs Minister, G. Kaito Aye liasü.
Sumi nunger den Ahuna benjung salem lemsatepa tongti tesemdangeri Sumi nunger dang pei kin ajungtsü atema longjema alitsü ayongzük.
Iba benjungmong nung maparen tasen balala sayaba ngua tepela nung Minister-i lokti dang Sumi nunger ajangzüktsü atema pei maitsü aser sobaliba wazüka ayutsü ajungshi.
Sen indoka inyaktsü atema aikati Nagaland nung inyaktsü memelunger, aser ibaji kuli aika ajanga lir, ta shia Minister-i Naga nungertem dang asen rongsenkettsüng aser tourism ajungkettsü aser asen lokti nung terenlok alitsü atema yimjung alitsü asoshi inyaktsü ayongzük.
Sumi nungeri pa nem maongka agütsüba atema pelaba metetdakja Kaito-i maneni Naga nunger, talisa Sumi nunger atema inyaktsü, ta metetdaktsü.
State election merüka agitsü nüngdak, ta shia Minister-i, vote agütsütsüpur ajaki election merüka agiba nung shilem tajungtiba agitsüla, ta ashi.
Kaito-isa Sumi Hoho aser tongti tentettem dang district nung aliba constituency ajak nung election merüka agitsü atema inyaktsüla, kechiyong ibaji ajanga mapang ka nungbo tajangzük angutsü, ta metetdaktsü.
State nung ali kiburtem ajanga terenlok mapatem nung tetsükdaktsü ajurur, ta shia pai, Mariani-Mokokchung-Zunheboto-Chozuba-Jessami National Highway atema sen lemzüktsüogo aser maparen tenzükogo, ta metetdaktsü.
Paisa, “Dimapur-Showuba-Niuland-Wokha-Zunheboto-Aghunato-Shamator-Noklak-Pangsha National Highway atema-a 2018 küm February nungbo sen lemzüktsütsü imlar, anungji sensotemi ali angati agütsütsüla aser asen state nung terenlokji atangji nung atalokdaktsütsüla,” ta ashi.
Naga yimtenren onük dak sendakba nung Minister-i, kobi melii Kohima nung Naga nunger tongti lokti tentettem den senden ka ayonga amentsü, ta ashiba den külemi Sumi nunger danga Naga yimtenren onük tekaraba nung latettsü atema nungittsü ajungshi.
Iba benjunmong dak sendakba nung Kiyelho Yepthomi-i ketdangsüa Zunhoboto town nung taoba mapang Deputy commissioner tem, jila tentetertem aser mezüngpurtem nem tetushi agütsü aser district ajungtsü atema inyakba asoshi Dr. H. Sukhato Rotokha nem ‘best tetushi agutsü.
Iba sentong nung Advisor, Pukhayi Assumi, Advisor, Hukavi Zhimomi, DC, Tridibesh Roy, DIG, KK Chishi, SP, U.Kichu, Commandant 5th AR, Keishan Debendra, 2i/c, Gopa Kumar, HODs, President, Sumi Hoho, Hekushe Shikhu aser tongtibang lenir aika aden.
Iba sentong ya Co-convenor, Organising Committee, Kiyelho Yepthomi leniba nung agi aser Huskha Yepthomi-i Ahuna benjungmong teratet metetdakja liasü.
Vice-President, Sumi Hoho, Vihoshe Muru-ia o tatsüka jembi aser Secretary, Organising Committee, Lhokiye Yepthomi-i tepela anküp o jembi sentong tembanga liasü.