Dimapur nung lenmangtem yanglusür

Dimapur nung Old Dhansiri apu tejenba melena tasen ka yanglutsü ta sür taküm January nung shibangba sülen senzüsenbongertemi Dhansiri apu tasenba aser Full Nagarjan nung aliba Dhansiri apu adena senzüa liasü. Ajisüaka, taküm July ita Nagarjan nung aliba apu-a chireptsü tia ka ajuruba ajanga shibangtsüsa aküm aser iba jagi senzüsenbongertemi tang Dhansiri apu tasenba aser Thaheku yimtsüng adena senzüteper. Nagaland nung jila tulutiba aser anogoshia kanga dang kara ainba jilaji Dimapur lir aser iba ya Nagaland atema dang masü saka Northeast ajunga atema tongti tesem ka kümogo. Iba ama jila ka nung gari lenmang tajung alitsübaji kangasa tongtipang aser anogoshia gari meyirjang aika oliaruli ta senzür. Iba ama jila ka nungbo lenmangtem ya tesadem den süsüsüsüa menoker ayutsüla sernung nisung jajatsüa majungba tia ka nung lir. Iba ya tangar tsüngdang kanga dang taaktsüka lir aser iba tia ajanga asen lima nung ochimashi jungkai adoka sayur. Tongtipang aputem shibanger aser raksar joko ita aika süia arur saka tanü tashi asenoki terenlok mapa inyakba kecha balaka mangur. Osangkakettem nungbo Chief minister-i anir minister tem aser ketdangsertemi o aika jembizüka yokba asenoki züngogo saka parnoki jembiba o tem tu mapa nungbo mesayur.  Gari lenmang majungba den apu maliba ajanga senzüsenbongertemi anogoshi oliaruli ta senzüdang timtem-tuoshi jenti ajurur saka sorkar aser bangdak department temibo iba khuret mabener ama bilemer. Joko Thaheku adena süiba gari lenmang ya highway ka mesüka kümogo aser anogoshi iba lenmang nunga gari aika senzür. Dhansiri apu tasenba ajanga senzüdang mapang kanga agiba agi nisung aikati Thaheku adena senzür, saka iba lenmang nung tesem karbo kangasa mejungi lir. Nübortem tenzüktsü atema akümba sorkar ka asü nungbo, taküm apu shibangli tu iba lenmang nung raksar aliba tesemtemji yanglushir lila. Talisa, nübortem atema bilemtsüba sorkar ka asübo New Dhansiri apu anasa-a lenmang mejungi aliba tesemtem ya-a yanglutsür lila. Gari lenmang majungba ajanga gari lendong kanga bulua ataloker, gari lenmang majungba ajanga traffic jam kanga bulur, gari lenmang majungba ajanga gari raksar, gari lenmang majungba ajanga mapang shitak nung tatongtsü metongteter, gari lenmang majungba ajanga senotsü talila endoktsüsa akümer aser meshitetba timtem jenti ajurur. Ajakji meteta liaka, sorkari tenaronga marepzüi toktsüba ya angudang temulung kanga shiranger. Nagaland sorkar kübok gari lenmang aser aputem anepalutsü atema department tem tenteta lir aser küm shia lenmang tasentem yanglutsübaji toktsür, yanglua aliba lenmangtem anepalutsü atema Centre-i sen lemzüktsür. Anungji, Hornbill benjung aser Khristmas benjung amungtsü aliba nüngtem nungdanga sorkari tangsatang Dimapur nung gari lenmangtem ya anepalu nung kangadang ajungtsü. Yamaisa senzüka toktsüra aser nübortemi adokba ola mangashir ama dang sayura, shibai metet sorkar anema ali kiburtemi gari lenmang mokdanger lungkak aittsü akok mesüra iba dang nungi tamajungba tia ka ajurutsü ana nung lir.