Taylor Swift-i Selena Gomez aser Justin Timberlake den shilem agi

Los Angeles, August 28 (Agencies) : 1989 World Tour kübok kenten sentong punguba aser tatembangba nung Taylor Swift-i la sapurtem kanga süngmangdaktsü aser jangratemdaktsüogo.

Bodbar aonung Taylor den mezüng külemi shilem agibaji la indang tembar Selena Gomez liasü. Tan mezüngbuba atema Selena-i Taylor den külemi “Good For You” ken aten.

“Tang sabangi arutsü aliba nisung ya sempet aika aliba nisung ka lir aser lai inyakba mapa ajak nung kanga junga inyaker. La tobur tajung aser asayamenür ka aser la kanga temeimtsüka, sempet aika lir, tekolok techira aser kü tembar rongnung ka” ta Taylor-i Selena marudang telok dang metetdaktsü.

Kenten sentong tembangtsü lia Taylor Swift-i tesentepertem aoksadakja ano Justin Timberlake sabangi anir aru.

“Iba nisung ya ni sakloker kentener rongnung ka lir” ta lai ashi aser tenati külemi “Mirrors” ken aten.

“Justin tebu akümba sülen ken danga kenten sentong nung shilem magii aser tan mezüng pai kü den shilem agiba atema kanga pelar” ta Justin sabang nungi aoba sülen Taylor-i metetdaktsü.

Iba sülen Taylor-i Phoebe Buffay (Lisa Kudrow) sabangi anir aru aser tenati “Smelly Cat” ken aten.

Iba kenten sentong nung Justin Timberlake kinüngtsü Jessica Biel den Julianne Hough, Reese Witherspoon, Jack Antonoff, Alessandra Ambrosio aser Taylor Swift tetong Calvin Harris nungertem aden.