Tanur repranger India tsür US nung alir ka küm 14 tepuokdak ayutsü

New York, August 28 (Agencies): Arishi küm 29 tain, tangar tanur reprangtsür, India tsür America nung alir ka lai reprangba tanur ka asüba ken o nung la aiba ajanga tepuokdak küm 14 ayutsü obendang agütsüogo.

Kinjal Patel-i repranga aliba ita 19 tanur, Athiyan Sivakumar January 19, 2014 nü Yale-New Haven Hospital nung asüba ken o nung court-i aitsüogo.

Lai Athiyan Sivakumar reprangba mapang pa dak tashii yiruba zübo keta liasü.

Mozü kidang tetendangertemi ashiba agi iba tanur ya onsara kangshia süogo.

Patel meyong okatsür, Kevin Smith-i ashiba agi iba tanurji asaa südaktsüba masü.

“La dak tanur yirutsütsü tebilemba tamajung kecha maliasü,” ta Kevin Smith-isa ashi.

“Kü dak tanur reprangtsü tajangshiba aika maliba agi ni anepalutsü memeteti iba ya atalokdaktsü südi,” ta lai ashi.

Police-i ashiba agi Patel-i tanur chiyungdaktsüba mapang tanur jagi mechiyungnüi kanga atsütep aser iba mapang tanur jagi Patel tejak nung tzü-a moloktsü.

Iba sülen Patel kanga jashiba agi tanur tetsüngji atem nung asemben atonga atonga ajendaktsü, tekolak tashii ashishitsü aser iba sülen tanur tejak nung nungoktsü dang atem nung tekolak tesülen tashi lua ako, ta la aputsü aruba shidi nung shia liasü.

Iba dak sentakba ken o tatembangbo October 29 nü ang jembitsü aser iba mapa Patel-i tatalokba tejangja metetdaktsütsü.

Superior Court Judge Patrick J. Clifford-i küm 14 sülen ano küm 20 tepuokdak ayutsü aser chiokera küm 5 tashi la mita alittsü, ta osang ajanga ashi.

La America senso masüji la küm 14 tepuokdak ayuba sülenbo lar linüki yoktsüla, ta Smith-ibo shiogo.

Iba ken o nung tanur tsüraburtema aija lir kechiba süra parnoki police dang tanur yiruba nung tiyazü jembi, ta osang ajangasa ashi.

Arishi küm 26 tain, tanur tetsü Thenmozhi Rajendran-i police dang lar tanurji lai repranga aliba mapang alang, ta ashi.

Arishi küm 35 tain tebuba Sivakumar Mani-ia iba otsü nung la pusema liasü.

Saka bushisüngdang asüba mapang ang December ita nung tanurji Patel-i repranga alidang yiru ta putet.