Centre sorkari linük merükmeju atema inyaktsü: PM Modi

New Delhi, November 19 (Agencies): Deobarnü World Toilet Day anogomong nung Ato kilonser, Narendra Modi-i, Centre sorkari linük nung merükmeju jenjang ajungkettsütsü atema inyaktsü, ta metetdaktsü.
Twitter nung video ka ajanga Ato kilonser, Modi-i linük nung moaputem nung metsümeshiba meshimeshia anentsüji kanga tongtibang, aser ibaji tetsürtem atema sempet tajungtiba asütsü, ta metetdaktsü.
Kasa video nungsa pai Swachh Bharat Mission kübok linük nung metsümeshidak aika yanglutsüba indang metetdaktsü.
Pai twitter ajanga, “India tesem balala nung metsümeshidak aika yangur nija aser lokti tentet ajak nem ni tenüngsang agütsür. Parnok mapa tajung ajanga Swachh Bharat Mission ajungkettsü,” ta ashi.
United Nations General Assembly-i official süa 2013 küm November 19 anogo ya kümshia World Toilet Day asütsü ta sangdonga liasü, aser iba maparen nung UN-Water den sorkartem aser partners-i yatitepa inyaker.
Tanü alima nung nisung billion 4.5 dak temabo pei kidang metsümeshidak mali. 2015 küm tenzükba Sustainable Development Goals nung 2030 küm tashi nungbo alima nung kibong shia metsümeshidak alitsü nükjidong lir.