October 1 nungi linük ajunga nung AIMTC lungkak aitsü

New Delhi, August 28 (Agencies): Hokolbar nü linük nung truck anirtem tentet tulutiba AIMTC-i, sorkari parnoki akhangba onüktem mataloktsü, anungji October 1 nungi tenzüka mapang telatet kecha makai lungkak aittsü, ta sangdongogo.

All India Motor Transport Congress (AIMTC)-i ashiba agi, linük nung truck anishir lakh 93 den bus aser tourist operator lakh 50 lir.

“Saru aser Tax Deduction at Source (TDS) densema onoki ajuruba tebilemtsü onüktem benokba nung Transport ministry-i tamakok aludaktsüogo, anungji October 1 nü nungi mapang telatet ka makai onoki linük tesem ajaklen lungkak aittsü,” ta tanü New Delhi nung AIMTC Tir, Bhim Wadhwa-i osangbenertem dang ashi.

Linük tesem ajak nung truck anirtem lungkak aitra osettsüset aser chiyungtsü mebelenba ajanga anogoshia linük sen crore 1,500 nungi 1,700 tashi takoksa alutsü, ta paisa ashi.

“Yashi onoki Road Transport & Highways Minister Nitin Gadkari ajuruogo, ajisüaka telangzüba mangu. Iba mera (lungkak) agitsüba dak alaka onok asoshi tanga lenmang kecha mali,” ta Wadhwa-i ashi.

Paisa ashiba agi, sen saruba süngküm (toll plazas) agienra gari sadem-sadema senzütetiba ajanga küm nung nüburtem sen crore 87,000 kümzüktsü, aser ibaji linük GDP shilem 3 lir.