Rahul Gandhi-i Congress Tir menden atema tenüng agütsü

New Delhi, December 04 (Agencies): Hombarnü Congress tatong Tir, Rahul Gandhi-i party tongti menden atema tenüng agütsüogo.
Congress Tir election nung candidate ji arishi küm 47, Rahul Gandhi kija asütsüa akok, aser pa party Tir shimtsü atema lenmang ajak sadema lapokogo. Yamaji süra pai tetsü, Sonia Gandhi menden melentsü. Sonia-i tesüiba küm 19 tashi Congress Tir inyaka arudar.
Deobarnü tashi nung Congress Tir election atema shingaia tenüng magütsü, ta tanü Congress Central Election Authority mendenbuba, Mullapally Ramachandran-i metetdaktsü.
Rahul Gandhi atema proposer anaji Sonia Gandhi aser taoba Ato kilonser, Manmohan Singh na lir.
Candidate tenüng agientsü atema tatembangbuba anogoji December 11 lir aser election December 16 nü agiba sülen December 19 nü vote azüngtsü.
New Delhi nung osangbener den jembidang Ramachandran-i, “Tang tashi nung state unit delegates nem nomination form 90 agütsüogo. Tang tashi nung shingaia tenüng agüja mali,” ta metetdaktsü.
Congress communications in-charge, Randeep Surjewala-i party general secretary tem aser CWC züngsem ajak den states aser frontal organizations ajaki Rahul Gandhi tenüng nung nomination form file asütsü, ta metetdaktsü.