Manipur-i Nagaland den tesentaktep tajung yunür

Kohima, December 5 (TYO): Naga yimten tebilemtsü atema küm aika obang meputepi aruaka tanü Manipur Chief Minister, N Biren Singh-i Nagaland den tesentaktep tajung ayutsü tejangraba metetdaktsü.
Külemi azükarutsü aser külemi ajangzüktsü atema Manipur aser Nagaland tsüngda tesentaktep tajung ayutsüla, ta pai ashi.
“Asen külem putiotsü aser sobaliba anasatepa aliba nung ajemdaker, asenoki tamendakdak tajung ka yanglutsüla. State anaprong nung aliba nübortemi külemi liyonga aotsü aser amalitep alitsü atema asenoki tesentaktep yanglutsüla” ta Biren Singh-i tanü ayongzük.
Kisama nung Hornbill benjung anogo pungububa nung o jembidang Manipur Chief Minister-i iba tayongzükba agütsü.
“Külemi alizüngtem ayuba aser külemi mapa inyakba ajanga dang asenok külemi azükarutsü aser külemi ajangzüktsü” ta paisa ashi.
“Manipur aser Nagaland nati kidanger ama state anaprong nung asenoki magiteti aliba maongkatem agitsüla aser nübortem talisa lanurtem taginübatem tongtsütsüla” ta Singh-i shisem.
Manipur kübok Imphal aser Nagaland kübok Kohima nung World War-II raraba indang putiotsü aser kulitem wazüka ayutsüla.
“India linük nüjiso anguba sülen Indian national football team nung mezüngbuba captain Dr T Ao-i senmang yutsüba nung ajemdaker asenoki saisapongba nung temulung agütsütsüla. Asenoki külemi lanur saisapongertem ajungkettsüla aser iba atema mapa inyaktsüla” ta Manipur CM-isa ayongzük.
Manipur aser Nagaland tsüngda ‘people-to-people’ aser rejutem tsüngda tesentaktep alitsüla aser entrepreneurship, skill development, commerce, arts, culture, films & theatre nung yariteptsüla, ta paisa ashi.