Northeast India nung raliwaliba ren nung tetsükdaktsü aliba agintsütsü: Union minister KJ Alphons

Guwahati, December 6 (Agencies): Union Minister of State for Tourism K.J. Alphons-i mongolbarnü northeastern states tem linük aikati Level II destinations ama züngshiba ken o ya jenjang shidak nung jembishinüa melenshitsütsü, ta tenangzükba agütsü.
Paisa ashiba agi, northeastern states nung raliwaliba ren tali ajungkettsü atema bendang lima nungi indang indanga iba tesemi tayimtsü arudaktsütsüba dak sendakba nunga ken o reprangshitsütsü.
Union Minister-i northeastern state tem raliwaliba ren ajungkettsüba atema lenmang sadema lapoka aliba tenüng asangba den külemi state sorkartem dang parnok ajak longjemer iba maparen ya ajungkettsü asoshi ajungshi. Paisa ashiba agi, iba tesem sobaliba, inyakyim aser yimsü ya alima nung kecha tesem dena mesüktepa mali, aser khenyongi balaka lir.
“Alima linük balala, Japan amalai India nung northeastern states Level II category destinations nung dokja aliba ken o ya temai bener adoka jembishinütsü. Iba tetsükdaktsü, ya yakta agintsütsü, ta ni nangzüker,” ta Ministeri ashi.
“Maneni bendang lima nungi northeastern states temi tayimtsütem indang indanga arudaktsütsüba dak sendakba nung Ministry of Civil Aviation den ken o benoka asadangtsü. Taoba küm ka tsüngda nung ozü sorkari linük ajunga nung airport aika yangluogo aser Ato Kilonser Narendra Modi-i northeast nung kanga temulung agütsür,” ta paisa ashi.
6buba International Tourism Mart ajanga India nunger “Act East Policy” tali ajungkettsü imlar. Iba sentong ajanga India ASEAN aser tanga Asia linük tuluba den tesendaktep tajungba kümdar, aser item tesemtem ya Alima nung rongsen ketsüng nung kanga kera renloka aoba linüktem lir.