Johnny Hallyday: France’s ‘Elvis Presley’ arishiküm 74 nung süogo

December 6, 2018 (Agencies): France nunger rock star Johnny Hallyday tepokpok cancer agi kangshiyar arishi küm 74buba nung süogo.
Kentener yagi tang tashi nung kensep million 100 shi yokogo aser 1960 nungi tenzüka pa career peyong nung film aika nung shilem agiogo.
1997 küm pa tir Jacques Chirac-i, Chevalier of the Legion D’Honneur kümdaktsü. France nungertemi pa dang “Our Johnny” ta dang jaya liasü.
Sangdong ka ajanga pa kinguntsü Laeticia-i yamai ashi: “Johnny Hallyday-i onok toktsüogo. Ni item o tem mamangteti zülur, saka ya ochi lir. Kü meimsang joko onok den mali. Pai onok taonung toktsür ogo.”
Hallyday indang shidakba tenüng ya Jean-Philippe Smet lir, pai 1975 küm screen nung Elvis Presley anguba sülen pa kentener akümtsüba telemtetba agi. Hallyday fan tem pa nem nickname “French Presley” ta agütsü.
Par chir Laura aser David nati yamai zülutsü: “tanü küboi onok toktsür ogo. Onok kanga mepelateter.” Tenati maneni fan temi parnok nungita yariba atema pelaba metetdaktsü.
Laura tetsü, Nathalie Baye-i Instagram nung black square tazüng ka inoktsü aser caption yamai zülutsü: “Kü mangyimba ulura.”
Iba osang angashia French tir Emmanuel Macron-i kensep ka tetshia “There is a little bit of Johnny in all of us,” ta ashi. “Putu aika pai France nunger taküm aika dak kongshiogo. Pai parnok pa mulungsoba yimya koba concert nunger nung nguogo, item ajanga nüburtem puaogo,” ta paisa ashi.
Maneni France nunger politician tem rongnung taoba tir François Hollande aser Nicolas Sarkozy, Paris Mayor Anne Hidalgo aser taoba Prime Minister Alain Juppé nungeria asükhu lemsatepogo.
Iba osang angazüka west of Paris kübok Marnes-la-Coquette jila nung par kima Fans tem sentep. Osangbenertem den jembidang fan kati ashiba agi, “Ni temulung ana kümogo. Kü mulungh kanga raksar.” Paisa ashiba agi, pai Johnny indang concerts 1,000 reprangtsü imlaa liasü.
Maneni entertainment industry nungia 1950 aser 60s nung French film icon Brigitte Bardot-i iba osang angashia la kanga aoksaba lemsatep. “Johnny ya monument ka lir. Pa ya France lir,” ta lai kentener tener den azüteper tangokba noksa ka iba olen den külemi post sütsü.
France nunger dak alaka bendanger tem rongnungi American guitarist Lenny Kravitz-ia asükhu lemsatepa liasü
Pa France nung kanga nüngtugu liasü saka American mesera English jembiba market nung kangabo nüngtugu maküm.
USA Today osang kaket ajanga khenbo pa ya nenoki mangashidangba rock star ta zülutsü.
Hallyday ya kanga dang mapa meranga inyakba nisung ka liasü aser kena ani mesüngzüki dang kentenba sentong balala nung senzüa liasü.