Mumbai University nung Ao oshi sayutsü

Prof. A.Lanunungsang (achijilen) -i Wb.P.Alem Jamiri züluba kaket “ Ao Oshi Ojangrü” sayatsüba noksa nung angur ( Dimapur, August 28, 2015) 

Dimapur, August 28 (TYO) : Memenui Mumbai University nung Ao oshi sayu tenzüktsü asoshi tazüngtsü kaket renema agütsüogo ta tanü Hokolbar nü yangi Dimapur nung Nagaland University nung Pro Vice Chancellor aser Ao Senden Literature Board nung mendenbuba Prof. Lanunüngsang Aoi metetdakdaktsü.
Pai iba o ya Wb.P.Alem Jamiri züluba kaket ka tenüng agi “Ao Oshi Ojangrü” sayatsüba sentong nung jembidang metetdaktsü.
Prof. Lanunüngsangi ashiba agi, Mumbai University nung Ao oshi sayuba Diploma course ka tenzüktsü asoshi Nagaland angh, Wb.P.B.Acharya ajanga inyaktepdagi aser ibaji atema pa ajanga Ao tazüngtsü kaket renema bener yokogo. Anungji, Mumbai University nung Ao oshi sayutsü atema yakta tesayur nüngdaktsü ta paisa asshi.
Ano, Prof. Lanunüngsangisa ashiba agi, Nagaland nung school-tem nung akhidang ama English subject talila ka ‘Alternative English’ agia aliba melena Naga nunger pei pei kin lipok aser sobaliba indang azüngtsü renemogo.
Iba denji ano, Nagaland Univeristy nunga yakta ” Center for Naga Tribal Languages” lapoka pei pei oshi tajungba renloka aotsüsa inyaktsü.
Wb.P.Alem Jamiri züluba “”Ao Oshi Ojangrü” ya ojang mesüra olong kasa saka tetezü balala aketbatem ojangtem noklang trok dak tali bushia tetezü English aser Ao oshi nung agüja lir. Tatishitsü agi, ajem (needle),ajem(drank), ajem (trampled), ajem (discount), ajem ( like minded), ajem (scared), ajem (calm), ajem (supplement) aser ajem ( doubtful) ta asüba jang tetezü meyirijang aika agüja lir.
Iba kaket ya tanur tain ajak atema kanga tongtibang kakrt ka asütsü aser University tashi nung iba kaket ta amtsü ta ASLB mendenbubai metetdaktsüogo.
Tanü iba kaket sayaba sentong ya East Dimapur Ao Baptist Arogo tenla kidang agia liasü. Iba sentong nung tepela aser pusem o jembirtemji Tir Yimyim yimozülur, Wb.K.Temjen Jamir, Heritage Publishing House kibur Dr.Lanusangla Tzüdir, Langpangkong Senso Telongjem Dimapur nung tir Wb.Meyi Longkumer, Changtongya Senso Telongjem Dimapur aser Changtongya Watsü Unit, Dimapur nung lenirtem liasü. Iba sentong nung Dr.N.Tiameren Ao menden liasü aser EDABA nung sannüker Wb.I.Jongpong Imsongi meshiteta sarasademtsü. Iba sentong tenzüka tebu tedi Süpong Imsongi sarasadem aser tatem nung kaket zülur P.Alem Jamiri teyaritepertem ajak dang pelaba metetdaktsü.
Iba kaket ya CLC Dimapur aser ABAM Book Stall Mokokchung nung angutsü.