Arunachal Pradesh nung RBI Office temeja ka amenoktsü

Itanagar, December 08 (Agencies): Hokolbarnü Arunachal Pradesh yimtiba, Itanagar nung Reserve Bank of India (RBI) Executive Director (ED), Surekha Marandi-i Arunachal Chief Minister, Pema Khandu ajurua liasü, aser iba mapang nung tenati RBI dak sendakba onük kar nung o lemtep.
Marandi ya consumer education & protection department, financial inclusion & development department nung tongi lir. La Executive Director makümdang la RBI nung Principal Chief General Manager aser Chief Vigilance Officer inyaka liasü.
Marandi-i Chief Minister dang, RBI-i Arunachal Pradesh nung RBI office ka amenoktsü, aser ibaji state yimtiba nung amenokner, ta ashi.
Laisa, ita 3-6 tsüngda state nung RBI office ka amenoktsü atema maparen tenzükogo aser Arunachal Pradesh indanga RBI office temeja ka alitsüla, ta ashi. Iba atema RBI dang pelaba metetdakja CM, Khandu-i state sorkari iba maparen nung akokba tashi yariteptsü, ta la dang ashi.
Paisa, ibaji ajanga senotsü dak sendakba maparen nung kanga anisüngzük angutsü, kechiyong item maparen atema state- Guwahati nung aliba RBI office nung dang metaloker alir, ta ashi.