Nisung pua bener orr merenshiba aitsür

Dimapur, December 08 (TYO) : Dimapur nung December 03, 2017 aonung Development Authority of Nagaland (DAN) nung Secretary, Wb.Imtilepden, Super market nung par kidang nungi nisung kari pua bener oa tsübudakja reshikangshiba mapaji aitsür ta Ongpangkong Senso Telongjem Dimapur-i metetdaktsüogo.
Iba ama nisung reshikangshiba tasü mait mapaji Naga nunger loktiliba nung magizüktetter, anungji ozüng amertemi item ozüng raksartemji pua temerenshi agütsütsüla ta OSTD-isa metetdaktsü. Item aibelenertemji pua maru tashi animesüngzüktsü ta parnokisa metetdaktsü.
Ano, Aliba Senso Telongjem Dimapur-ia parnok züngsem tajung aser DAN nung Secretary, Wb. I.Imtilepden Pongen nisung kari NSCN telok tenüng amer pua bener oa merenshibaji kanga sashia aitsür ta metetdaktsüogo.
Pa ya tenük zübangtsür aser teben tesülen alener ammang piyong Nahabari nung yutsü aser anepdang 10 ako shi nung dang temeket nung alirtemi paji ngua kidangi meyipa anir aru ta Aliba Senso Telongjem Dimapuri sangdong ka nung metetdaktsü.
Iba ama mapa tamajung inyakertemji pua merenshitsüsa tapet mapa inyakdaktsüner ta parnokisa mepishia metetdaktsüogo.