Gujurat yimdaklirtem dang nungi ajizükdi

December 9, 2017 nü Gujarat assembly election mezüngbuba shilem agidang yimtsüng ka nungbo nisung shingaia vote magütsü. Yimdaklirtemi iba ama telemtetba takang agia mapa inyakba asoshi tenüngsang agütsütsüla aser asenokia tangatetba tajung nung iba inyakyim ajizüka inyaktsü nüngdak. Iba yimtsüngji Morbi district nung Gajadi lir aser parnok yimtsüng nung tzü peria manguba tejashi nung yimdaklirtemi election nung vote magütsütsü telemtetba agi ta osang angazüker. Osang ajanga ashiba agi, iba yimtsüng nung alirtemi ita ishika tejakdang tzü peria magütsüra vote magütsütsü ta osang metetdakja liasü saka sorkari aser bangdak ketdangsertemi parnok temepishiba magizükba atema parnoki vote magütsütsü telemtetba agi. Polling anogo nunga ketdangsertemi yimtsüng tonga orr yimdaklirtem dang vote agütsütsü mepishi, saka vote agütsür nisung 1000 shi liaka, nisung kati danga vote magütsü süidaktsüogo. Iba ama tasütait mapaji asenok Naga nungertemia ajizüka inyaktsüla aser yamaji inyak nungdang yimsüsürtemi nübortem taginüba meteta aser ola adokba angashia nendaka inyaktsü südi ta bilemer. Nagaland nung terenlok mapatem reprangdangra, taoba mapang yanglubatem raksaba mesüra raksaa aoba dak alaka tasen inyakba balaka mangur. Gari lenmang nungi shir aputem, sorkar school ki nungi shir public tesemtem, tzü nungi shir ration, ano aika tepetzük tia nung lir. Nagaland kübok aliba yimtsüng mesüra kiyong shia semdanga oa idakji aliba nübortem dang asüngdangra, lenmang majungba, tzü peria meyokba, apu maliba, mozü ki maliba, school ki chirepa taoer aliba aser ano osang aika ashitsü. Election shia yimsüsürtemi iba ya inyaktsütsü, ibaji inyaktsü, iba tu renemtsütsü ta tenangzükba balala agir, saka asenoki election nung parnok nem vote agüja takok ngudaktsüba sülenbo tenangzükbatem tu koyai sür ao ta asüba den kasa akümer. Joko asenok ojang dang mesüshidaktsüdi, joko asenoki tiyazü tenangzükbatem dak memangli, joko asenoki asen vote yoka mechili, joko asenoki asen Naga lima okronga melidaktsüla. Naga nungertem saksalemtsü mapang tongja tongogo aser asenokia Gujurat nung yimtsüng ka nungi yimdaklirtemi noktakba ama, asen temeten aser tangutsü tim atemabo kecha menungnangi ola adoktsüla aser noktaktsüla. Asenok den kidangsüa aliba state tem aser Nagaland tsüngda tilatiba agi lenmang medemdangdi. Asen kidanger state tem nung aliba lenmang nungbo tera dang mekümdangi jajara ajudoktsüsa menokteta lir. Parnok state tem nungbo terenlok manung terenlok aliba angur aser public asoshi mapa balala inyaktsüba asen tenük agi angur. Süra, Nagaland nungbo kechi tai? Iba asoshi asenoki arokaroka shisadangtsü nüngdaker. India linük kübok state ka ta ser alir asünung, election ajanga yimsüsürtem shimteta, parnoki sorkar kümer state ajunga madak ketdangsüa inyaksangshi aoer. Terenlok mapa inyaktsübaji sorkar indang tebilemtsü aser parnok indang teinyaktsü tongtipangtiba lir. Nübortemi shimtetba sorkar asünung, sorkari pei nija asoshi masü saka public taginüba aser nüngdaktem asoshi inyaktsü atema mapa lemzüka inyaker sernung, asen state nungbo sorkar nung züngsem akümbaji pei nija mesüra pei den jungtepertem atema inyaktsüba tashi angur amai dang angateta ketdang asür ama ajiteter.  Nagaland kanga mejungi laoa lir aser iba ya tanü asenoki memesora, asüngbo kanga menuadoker asütsü. Anungji, arungma sangküm asen state assembly election agitsü ta jembidarji, constituency balala nung yimtsüng mesüra kiyong nung alirtemi ola adokangma. Nür tata yimsüsüri mesüra yimten telok kari taoba election nung nür alidak mapa kar inyaktsü nangzüka yur tang tashi meinyaktsüi lira, tang ya iba atema ola adoktsü mapang tajung lir. Asenoki tamajung dang tamajung aser tajung dang tajung ta ochishia ashitsü atema tasü aittsüla. Lenmang mejungi lira, yanglujang ta shiangma, tzü peria magütsür süra, peria agüjang ta shiangma, school ki chirepa taoer süra, tangsa yanglujang ta ola adokangma. Yamaji asenoki shiaka, parnoki hao ta melii yutsüra aser mapa kecha meinyaktsüra, taruba election nung item nübotemjisa tokteptsü noktakra, Gujurat yimdaklirtem amaji vote magütsüli arungma.