Election matongdang yimten latettsü imlar: TR Zeliang

Kohima, December 12 (TYO): Prime Minister Narendra Modi-i Naga yimten latettsü atema kanga süoki ia bilemer, anungji state sorkari tekaraba nung iba onük atema telemtetba ka agitsü imlar ta Nagaland Chief Minister TR Zeliang-i ashi.
State Banquet Hall nung Legislators Pre-Christmas sentong sülen osangbener den jembidang, “state sorkari ‘solution not election’ indang telemtetba magi saka Naga kin teloktem aser civil society temi ang ‘solution not election’ indang jembir” ta TR Zeliang-i ashi.
“Nübortemi shimtetba yimsüsürtem ama onoki sangküm agitsü aliba state assembly elections matongdang Naga yimten latettsüla, aji mesüra elections thinentsüla ta bangzünga renem. Onoki India Linük Temzüng kübok tenangzükba agi aser election arura onoki tokteptsüla. Aji agi onoki elections matongdang Naga yimten latettsü tayongzüba agütsür” ta paisa ashi.
India sorkar nungi kechi telangzüba agütsür ta osangbenertemi asüngdangdang, “telangzüba tajung angur, India Tir aser Union Home Minister nati Hornbill Benjung nung adentsü arudang election matongdang yimten latettsü atema inyaktsü ta nangzükogo saka asenoki kechi ataloktsüar meshitet” ta chief minister-i langzü.
Dr Shurhozelie Liezietsu-i aniba Naga People’s Front (NPF) den putepshiba sülen pai aniba ministry nung temelenshi alitsü asü koda ta osangbenerisa asüngdangdang, “tang tashi nungbo telemtetba kecha magi aser tang aliba amaidang oa atatsü” ta paisa langzü.
“Telok anaprong ajurutepa mejembitep. Telok ana nungi teshimtet nübotemi dang sign sütepa lir. Ajisüaka, iba onükji asüng DAN Legislator’s senden nung jembitsü” ta TR Zeliang-isa ashi.
Putepshiba tetezüji onok party-i meyipa aruba lir, kechiyong Election Commission of India-i onok indang party tamaitsü sota ayutsü akok ta onoki tsübua liasü. Yamaji ka atalok nungbo Naga nunger atema tamajung asütsü aser iba tensaji majurunüba agi onok putepshitsü telemtetba agi, ta paisa metetdaktsü.