Nagaland nung Scholarship forms aser Public Grievance Redressal e-Service tenzükogo

Dimapur, July 8 (TYO) : Digital India Week tenüng nung Information Technology & Communication Department-i Scholarship forms o Public Grievance Redressal atema e-Services sayaba sentong ka ayongzüka agiogo.
Bodbarnü sentongji Secretariat Conference Hall, Kohima nung agi aser Additional Chief Secretary & Development Commissioner, Nagaland, R. Binchilo Thong IAS tongti tesemdanger liasü.
Binchilo-i o jembidang, e-services ajanga senosanger nem tajuangzük bener arutsüba indang ashi.
Digital India tenzükba ajanga yimtsünglen ketdangsübaren nung temelenshi tulu adoktsü imlar, ta paisa shisem.
Taoba mapang kaketshir kati scholarship form zülur agütsütsü atema Directorate-i anaben tashi aitsüsa aküm saka tangbo online applications aliba ajanga kaketshirtem office-i aotsü nüngdak madoker aser parnok indang scholarship senjia parnok account nung dang enoktsütsü, ta Binchilo-sa metetdaktsü.
Public Grievances Redressal system atema jembidang paisa ashiba agi, taoba mapang public grievances atema Department tem dangi telephone asüba aiben magizük saka tang Public Grievance Redressal portal lapokba ajanga Department ajak tashishi melii inyaka ottetsü, anungji Nodal Officer temi mapang shitak nung telangzüba agütsütsü ayongzüker, ta Additional Chief Secretary & Development Commissioner-isa ashi.
Tanü agiba sentong nung mendenji Commissioner & Secretary for IT&C, K.D Vizo ITS liasü aser Joint Director & HoD, IT&C, Tongtiliba Longkumer-i anküp tepela o jembi.