11buba Marsosang football trophy tanü nungi tenzükogo

Parliamentary Secretary, Industries & Commerce and NIDC, Amenba Yaden den asayamung ayongertem aser asayartem, asayamung lapokba sentong nung tangokba noksa nung angur.

Mokokchung, December 12 (TYO): 11buba Marsosang football trophy Chuchuyimlang jila nung tanü nungi tenzükogo. Iba asayamung lapokba sentong nung Industries & Commerce and NIDC Parliamentary Secretary, Amenba Yaden tongti tesemdanger liasü.
Asayamung tenzükba sentong nung Yaden-i ashiba agi, Chuchuyimlang jila ya langpangkong ajunga atema kaketshisaliok bushiba nung dang teyongtsü ka masü saka saosapong balala atemaa tiyongtsü ka lir. Pai maneni iba asayamung ayongba telok, Rocky club puri saisapong balala, talisa football asaya samaa modaktsüi, iba amala asayamung ayongzüka akaba atema parnok tenüng asang.
Sentepa aliba lokti ajungshia Parliamentary Secretary-i nüburtem dang kima asayaba saisapong balala nung shilem agitsü asoshi ashi. Pai ashiba agi, iba amala saisapong nung shilem agiba ajanga temang nung teyari agütsüba dang masü saka ki telung nung computer aser tanga electronic oset balala dang amshia kazürtem dang nungibo iba amala nung shilem agiba ajanga lokti nung sobalibatsüba aser tazüokba nung aintsüba angazüker.
Maneni pai, Forum for Naga Reconciliation puri aachaayanga Naga nunger telungpur telok balala tsüngda football asaya ayongzüka asayaba tatashitsü bener arua, football ya nisungtem longjemdaktsütsüba aser teloka ama inyaksangshitsüba angazüktsü asoshi sabang tajung ka lir ta ashi.
Asayamung lapokba sentong tenzüka Chuchuyimlang town Baptist Arogo Associate Pastor(W) Katinaro-i sarasadem aser asayamung ayongba committee züngsem M.Pangjung-i tesentepertem pela agizükba o jembi. Maneni sentong nung EAC Chuchuyimlang town Tokai aser Temsuangshi, Tatar-i o tatsütsü jembi aser melodas de Gracia puri ken tajung ka aten.