NSF-i Dec. 16 nü Departmental Examination magitsü tuyur

Dimapur, December 13 (TYO): December 16, 2017 nü Departmental Examination agitsü telemtetbaji meyipa agir anogo melenshitsü akhanger ta Naga Students’ Federation (NSF)-i School Education Minister dang shidi ka nung metetdaktsü.
Iba tatidang agitsüba osangji November 30, 2017 nü sangoktsü saka anogo trok tsüngda nung tenüng agütsütsü mapang atsüra agütsüba ajanga kaketshir aikati tenüng magütsütet. Talisa kaketshirtem aika meta talanglanglang pilar alir aser iba jagi kaketshir kar dak alaka aikati mapang shitak nung tenüng magütsütet, ta NSF-i metetdaktsü.
Talisa, iba osang ya jungjunga meprokshi aser ano state portal nunga upload masü. Anungji, kaketshir ajak ajungtsü mechi aser tetemjen kaketshir ajaki tatidang agütsütettsü atema December 16 nü agitsü aliba tatidang thinentsü akhanger, ta NSF-i School Education Minister dang ashi.
Ajiüaka, December 16, 2017 nü Departmental Examination ji agitsü merangra NSF-i department nem tatidang magidaktsütsü atema tenokdangba agütsütsüsa akümtsü, ta shidi nungsa metetdaktsü.