PM Modi-i tashi taliba amshitsü: CPI

Hyderabad, December 18 (Agencies): Gujarat aser Himachal Pradesh elections nung BJP-i takok anguba dak sendakba nung tanü CPI general secretary, S Sudhakar Reddy-i, Ato kilonser, Narendra Modi-i pa kijai ano tashi taliba amshitsüa akok, ta ashi.
Left party lenirisa, joko BJP-i Hindutva mapatongtem taliba benoktsü, ta ashi.
Osangbener den jembidang pai, “Narendra Modi kijai ano tashi taliba amshitsüa akok. Ibaji India nunger democracy atema temaitsü tajung ka masü,” ta ashi.
CPI lenirisa, Gujarat nung Congress-i taoba mapang dang nungi tang menden timba nguogo; ajisüaka secular party temi BJP tamakok mengudaktsütetba atema sasar, ta ashi.
“Communal anema raratsü atema BJP anemba party tem longjemtsüla,” ta pai ashi.
“Ajisüaka ibaji (BJP anemba party tem aser Left party tem lengjemtsü) takoktsü ka süra, iba atemaji junga shisadangtsüla. O lemteptsüla aser telemtetba agitsüla. Tang-tangbo aritepa telemtetba agitsü makok. Secular party tem longjemer raratsü nüngdaker,” ta Reddy-isa ashi.
Tawa Congress Tir shimsang, Rahul Gandhi tushia pai, Rahul-i kanga junga nüboyimogo, aser iba mapang nung communal anema pai junga jembiogo, ta ashi.
Rahul lenir tajung ka kümer asü, ta asüngdangba langzüdang pai, ibaji pai party sasep nung inyakba dak keta lir, ta ashi.
“Congress mapatongtema melenshitsüla,” ta paisa shisem.