TR Zeliang-i advisor tasen 10 shimok ; Hoho temi sorkar inyaksangshi nung tebang maittsüla

Kohima, December 19 (TYO): Mongulbarnü Nagaland Chief Minister, T R Zeliang-i cabinet jenjang nung department balala nung Advisor tasen 10 shimok.
Advisor 10 ji E E Pangteang, Dr. Chotisuh Sazo, Yitachu, N. Thongwang Konyak, N. Thomas Lotha, Vikho-o Yhoshu, R. Tohanba, T. Torechu, Tovihoto Ayemi aser N. Jacob Zhimomi nungertem lir.
Tanü nikongdang State Banquet Hall, Kohima nung Chief Minister-i parnok nem tenangzükba agidaktsü.
Parnok rongnung Pangteang ya cabinet minister nungi advisor kümdaktsü aser külen Vikho-o, Thomas o Tovihoto nungertem parliamentary secretary jenjang nungi ajungket.
NPF sasep nung mepetmesü adokba mapang Sazo, Yitachu, Thongwang, Tohanba aser Torechu nungertem Dr Shurhozelie den dena liasü aser December 8 nü putepshiba sülen parnok Advisor menden nung aniokogo. Ajisüaka, Advisor shinga nema portfolio melemzüktsü.
Tenangzükba agiba sentong nung NPF President Dr Shurhozelie Liezietsu aser BJP President Visasolie Lhoungu naprong aden.
December 16, 2017 nü TR Zeliang-isa cabinet nung temelenshi ka süa minister 6 tasen shimoka liasü.
“Portfolio temji yakta alemtsü” ta taonung tenangzükba agiba sülen TR Zeliang-i osangbener den jembidang ashi.
Telok kati okadak Nagaland state sorkari parliamentary secretary aser advisor tem shimba anema ken o benoka aliba atema asüngdangdang, pai “okadaki obendang ka magütsü tashi shimbaji kecha masü” ta langzü.
Lotha nunger cabinet minister ana- Y Patton aser Mmhonlumo Kikon na menden nungi anentsüba atema Lotha Hoho-i mepelaba atema asüngdangdang “onoki iba atema kecha mashitsü kechiyong ministry ji MLA tem aser party ajanga dang akümer” ta TR Zeliang-i langzü.
“Party nungi kar anentsüra mesüra meindokra, tribal hoho-i iba ama inyaksangshi tiyongtsüi maittsüla. Arogo ka nungi züngsem ka endokra, hoho-i tebang maitsüla” ta paisa ashi.
Election matongdang Naga yimten latettsü atema jembir süra MLA temi tamasa menden nungi alutsüla ta Rengma Hoho-i ashiba atema tasüngdangba ka langzüdang, “NGOs nungi teinyaktsütem lateta magütsütsüla, saka ibaji India sorkar aser Naga yimten teloktem dak dang keta lir” ta chief minister-isa ashi.
“Kodaser kin hoho kati MLA tem dang menden nungi anenang ta ashir. Onok ya India Linük Temzüng ajanga akümba lir aser iba Temzüng nung aliba ama dang inyaktsü” ta TR Zeliang-isa shisem.
Taonung Cabinet Secretariat (Cabinet Cell)-i sangdong ka nung Nagaland Legislative Assembly nung Advisor, Cabinet Minister aser Parliamentary Secretary tem indang tenüngtem metetdaktsü.