PM-i Manmohan anema jembiba atema Cong-i maneni longkak ait

New Delhi, December 21 (Agencies): Ato kilonser, Narendra Modi-i taoba Ato kilonser, Manmohan Singh nem yazü nung tai tongloktsüba anema Congress-i Parliament nung maneni longkak ait, ta osang ka ajanga metetdaktsü.
Ajioda Parliament senden 5 nübuba nunga Rajya Sabha nung Congress MP temi Ato kilonser Modi-i taoba Ato kilonser Manmohan anema jembiba asoshi tatok meshitsüla, ta takhangba agütsü.
Iba takhangba agüja MP temi yimyim ayima longkak aitba ajanga senden aiben thinen.
Ano külen Lok Sabha nunga MP temi kasa takhangba agüja longkak aitba ajanga senden anaben tashi thinena liasü, ajisüaka sendenbo kaogo.
Chairman, M. Venkaiah Naidu-i, yangi shingaia tatok memeshitsü, ta metetdakja liasü.
Parliament kima osangbenertem den jembidang Congress lenir, Mallikarjun Kharge-i, “Ato kilonseri linük raksatsütsü meranger aser nüburtem tenüng tajung menüktsütsü meranger,” ta aitsü.
Modi-i Congress lenirtem aser Pakistan ketdangsertem miima senden amen, ta tai tongloktsüra, ibaji linük anema inyakba lir, anungji kechiba ibaji bushisüngdangtsü atema pai Intelligence Bureau aser tanga agency tem nem tetuyuba magütsür?, ta asüngdang.
Congress-i, Ato kilonseri Gujarat election nung takok angutsü atema pai yazü nung tai tongloktsü, tabo nangzüktsüla, ta akhanger.
Congress-isa, Atal Behari Vajpayee (taoba BJP nungi Ato kilonser) asübo paibo 10 ben-a tatok meshir lila, ta ashi.