Mexico nunger apu nung nisung trok alenseta sür ngutet

Mexico City, December 21 (Agencies): Mexico nung raliwalir asoshi nüngtugu tesemtem nung aliba apu asem nung nisung trok lisü agi alenseta sür lia ngutet, ta ketdangser ajanga ashi.
Item tasümang ya Baja California Sur state nung aliba highway tem nung Bodhbarnü ngutet, ta police temi ashi.
Apu shia nungi temang ana-na ngutet saka parnok ya anu mesangdongi lir.
Iba ama azüdokshi mapa ya iba tesem nung kanga bulua meliasü, saka tang renloka aoba mapang ka lir.
Item nisung trok temang ya Los Cabos resort tesem anasa La Paz, San Jose del Cabo aser Cabo San Lucas nung aliba international airport leni aoba lenmang nung ngutet, ta prosecutor ajanga ashi.
Iba ken o bushisüngdang tenzükogo, ta Baja California Sur state governor, Carlos Mendoza Davis-i ashi.
“Iba ama mapa tamajung inyakba aser azüdokshi aitsür. Baja California Sur nung iba tensa tamajung nungi takok angutsü asoshi nüburtem ajak longjema alitsü nüngdaker,” ta pai Twitter nung zülutsü.
Iba tesem nung January aser October tsüngta nisung 400 dak tali tepsetogo, ta osang ajanga ashir.
Mexico nung temesepba mozü ayoker aser achirtemi tangar telok dang tashi sayua, parnoki tepsetba nisungtem ya yimjak nung süngzü agi alener sangzüa yutsür, saka raliwalir bulua aliba Los Cabos tesem nung iba ama inyakba ya tang tasen lir.