2018 election nung Shehbaz Sharif ya Pakistan ato kelonser atema tokteptsü

Islamabad, December 21 (Agencies): Ato kelonser menden nungi atsüngdoker alisang aser Pakistan Muslim League-Nawaz tekolakba, Nawaz Sharif-i tenu Shehbaz Sharif ya taruba küm election nung ato kelonser menden atema tokteptsü asoshi Bodhbarnü shimtetogo. Shehbaz Sharif ya Punjab chief minister lir.
Iba telemtetba ya yasüng Sharif’er kidang PML-N lenirtem senden ka amenba sülen agi.
“Shehbaz-i teti nüburtem ajangzüktsü asoshi party sentongtem tajungba nung inyaktet aser iba ajanga pa temaba menden nung amentsü asoshi temulung lemtettsüsa intaktetogo,” ta Nawaz-i ashi.
“Onok ya democratic political party ka lir, aser nisung ajaki pei bilemba ashitsü maongka sadema lir. Shehbaz ya ken o kar nung tebilemba balala asür, saka pai bendanga agütsür inyakba ajanga item ajak samatsür, aser iba ajanga pai kodanga party temzüng nung aibelen masü,” ta pai shisem.
“Shehbaz Sharif-i ni kodanga mejashidaktsü,” ta senotsü ochimashi amshiba ken o nung aija alisangi ashi.
Nawaz aser Shehbaz Sharif na tsüngta tesendaktep mejungi liasü, saka iba sangdong ajanga adianu ana tsüngta tesendaktep tajung aliba sayur.
Nawaz Sharif ya Pakistan ato kelonser menden nung amentsü metemsü, ta obendang agütsüba sülen tenu Shehbaz Sharif ya par party lenir shimtsü memulungba ajanga adianu ana tsüngta mulung mechitep adoka liasü.