KU Aboi Unit Silver Jubilee among

Mon, December 22 (TYO): December 22, 2017 nü Konyak Union Aboi Unit Silver Jubilee sentong among; iba sentong nung tongti tesemdangerji, Arts & Culture Parliamentary Secretary, Eshak Konyak liasü.
Iba sentong nung jembidang tongti tesemdangeri KU unit Aboi tenteter züngsemtem nem akhüm agutsü.
Paisa, Aboi ya tesem tajung ka lir, ta shia tesem aser pei aliba temekettem merüka ayutsü ayongzük.
Paisa nüburtem dang, terenlok aser lokti aintsü asoshi longjemer inyaktsüla, ta ashiba den külemi clean election onük nunga jembia liasü.
Paisa Jubilee nüngshilong aser Jubilee Souvenir sayaja liasü.
Konyak Union Tir, S. Manlip Konyak-i nüburtem dang arem shirurutem aser ali nungi adokba rongsentem kümzüka ayutsü, shikariba anentsü aser mozü amshia ango apuba yimya anentsü ayongzüka liasü.
Iba dak sendakba nung pa lenirtem, taintem, Village Councils, Village Guards aser melungtet teloktem danga arem shiruru aser ali rongsentem kümzüka ayutsü atema ozüng takhang yanglua benoktsü mepishia metetdaktsü.
“Aboi senso ka asübaji maongka tajung, Tsüngremi Aboi nem ali rongsen aika moaja lir,” ta pai ashi.
Kasa sentong nung mezüngbuba Tir inyaksang, Y. Shahang-ia o tatsüka jembia liasü. Rev. T. Wano Missionary atlarge-i Jubilee nüngshilong sayatsü aser KU Aboi Advisory Board züngsem, K. Akai-i Aboi constituency nungi mezüngbuba yimtenren lenir, asür, Longnyem bilemteta jembi. Sentong nung Konyak Union Aboi Tir, N. Wanglem-i lokti pelaa agizükba o jembi aser Fellowship Pastor Aboi, Nokton-i Jubilee Souvenir meshitetja liasü.
Sentong nungsa ATBC Choir, Pongshong, KNSK Unit Aboi-i ken ka aten aser Upper Range Konyak, Chen Area Women Aboi, Chaoha Union Aboi, Langmeing Union Aboi temi sobaliba ken tena liasü.