IOC & KTU-i IMDH nung shiranger den küm tasen among

Mokokchung, January 03 (TYO): Küm tasen temoatsütem lemsateptsü aser Imkongliba Memorial District Hospital (IMDH) aser Mokokchung TB Hospital nung shirangertem peladaktsütsü nükjidong nung January 1, 2018 nü IOC & Kumlong Taxi Unit (I&KTU)-i shirangertem semdanga senotsü teyari agütsüba den külemi sarasademja liasü.
IOC & Kumlong Taxi Unit nung taxi 39 lir, aser parnok omen (motto) ‘Serve to Public’ nung ajemdaker parnoki iba hospital semdangtsü lemteta liasü.
Parnoki IMDH aser Mokokchung TB Hospital nung shiranga amonger parnok 40 jungnüa ajuru.
Unit den All Nagaland Taxi Association, Mokokchung (ANTAM) Tir, Tali Jamir aser tangar ketdangsertema densema liasü.
IOC & Kumlong Taxi Unit-i temeim mapa tajung sayuba ajanga benjung mapang nung mozükidang amonger shirangertem aser parnok anükertem kanga pelaa liasü.
Medical Superintendent Dr Medem leniba nung IMDH ketdangsertemia Taxi Unit-i mapang agütsüteta rongsen aser sarasadem agi nungita yariba atema pelaba lemsatep.
Ano külen IOC & Kumlong Taxi Unit-ia hospital semdangtsü atema maongka agütsüba asoshi IMDH MS dang pelaba lemsatep.
Unit-isa IMDH nung shiranga amongertem tekaratiba nung taneptsü angutsü atema maneni sarasademtsür aser Unit züngsem ajak den külem tasen salem osang lemsateper, ta metetdaktsü.