Tseminyu district kümtettsü takhangba agüja mokdanger

Kohima, Aenjeti (January) 3 (TYO): Rengma nungertemi district headquarter balaka kümtettsü takhangba agüja tanep 6:00 ako nungi mapang telatet makai mokdangtsü tenzükogo.
Kohima district kübok aliba Tseminyu ya district balaka kümtettsü atema parnoki takhangba agütsür.
Tseminyu nung Rengma Naga nungertem alir aser tang iba tesem ya Kohima district kübok sub-divisional headquarter ka lir.
Yashi nikongdang nungi tzünglu tanen makai aruaka timsürtemi tesem asem nung highway mokdanga lir ta Rengma Selo Zi (RSZ) tir, Kenneth Kath-i ashi.
Parnoki Henbenji, Tseminyu town aser Wokha district den arrtsüa aliba Kandi tesemtem nung lenmang mokdang.
Iba tenokdangba kübok administration, para military, press media aser shirangertem adenba ambulance, fire brigade, kiyimba, asüpila, convention aser conference tem atema senzürtem maiter.
Parnoki takhangba agütsüba ama telangzüba mangu tashi mokdangtsü ta Kenneth-isa metetdaktsü.
“Kohima district kübok aliba Tseminyu balaka razüka aotsübaji kanga tim aser iba atema tatemzükba kuli kecha nüngdak madoker. Tseminyu district balaka tentettsü atema sorkar mesüra tangar shingaia kuli bushitsü atema mapa inyaktsü nüngdak mali, ta paisa ashi.
Tseminyu district balaka kümtettsü dalang aser State Assembly election matongdangsa mapa küma inyaktsüla. Yamaji mesüra iba mokdangba ya ita aika alitsüsa akümtsü,” ta RSZ aser Rengma Students’ Union ajanga metetdaktsü.
Parnok tejashi sayua Nagaland Legislative Assembly nung MLA ka dang aliba jia menden tokjang ta ashitsü akok ta Rengma lanurtemisa shisem.
Rengma Naga nungertemi Luchii (December) 26 nü Tseminyu nung aliba Additional Deputy Commissioner indang office kima nung lungkak aitba sentong ka agi aser Luchii (December) 20 nungi Rengma Hoho-ia lungkak aitba sentong nung shilem agitsü tenzük.
Rengma nungertemi sub-division nungi district headquarters kümtettsü akhangbaji sorkari agizüka mapa inyaktsüsa akümtsü ta yashi Home Minister, Kuzhuluzo Azo Nienu-i ashi.
Rengma Hoho, RSZ aser Rengma Officers Forum dena tongti teloktem nungi tanishirtemi tanü nikongdang Home Minister Azo den ajurutep, ta Rengma Hoho tir Kenyuseng Tep-i osangbener dang ashi.
Tseminyu district balaka kümtettsü atema takhangba indang osang tejangja lemsatepba den iba takhangba nung paia pusema nungittsü atema Home Minister dang mepishi. Iba mapang Home Minister-ia telok dang pai iba mapa atema inyaktsü nangzük, ta Kenyuseng Tep-isa shisem.