Changtongya nung 2017 AKM memorial complex asütsü nüngshilung azüng

Changtongya, August 29: Taruba 2017 küm 67 buba Ao Kaketshir Mungdang lokti senden Changtongya nung amungtsüba lir, iba nüngtem Govt. High School ‘B’ Compound nung AKM Memorial Complex ta ser ka yanglutsü asoshi Minister for National Highways, Mechanical Engineering & Election Wb. Nuklutoshii Honibarnü nüngshilung ka azüngtsüogo.
Iba sentong nung minister Nuklutoshii jembidang, Changtongya nunger dak meranga inyakba sempet tajung ka lir, aser parnoki inyakba maparen ajak kanga junga aser tiptema inyaker, anungji, tanüngba Arkakong sangertemi parnok dak angazüktsü aika lir ta tenüng sanga metetdaktsü.
Tang ya state sorkar rongsenkettsüng nung anüngakongba mapang ka lir, aji oda süaka, akokba tashi AKM lokti senden dak sentakba mapatongtemji takok angutsü asoshi yariteptsü mulunga lir ta paisa metetdaktsüogo.
Tang koba Naga yimten tebilemtsü dak sentakba nung “Naga Peace Accord” onük indang India sorkar den jembishinüdagi, iba maparen nungji yimten, arogo, kaketshir aser lokti tentet ajak lungjemer peipei sasep nung khuret süa bilema nungittsüla ta paisa tayongzükba ka agütsü.
Iba sentong nung AKM tir L Jemti Longchar, T Imotemjen Jamir (Tatar), Tiasünep Lkr (Tatar) parnokia mapang agia o tatsütsü jembia liasü. Iba sentong sannüker Rev. I Wati Jamir den sarasadema tenzük aser sannüker Rev. C Manen den sarasadema tembang.
AKM memorial complex ya tarutsü nung lanurtem atema kechisarena asayadak multi-purpose hall amai ka asütsü tebilemba lir ta iba osangbeneri iba complex asütsü committee pur kar den jembidang parnoki lemsatep.