UN nung Hindi official oshi onük nung LS nung rongrong adok

New Delhi, January 03 (Agencies): United Nations nung Hindi oshi ya official oshi ama züngoktsü atema inyakba onük nung tanü Lok Sabha nung External Affairs Minister Sushma Swaraj aser Congress lenir tain, Shashi Tharoor na tsüngda o langzütepa rongrong adoka liasü.
Tasüngdangba ka langzüdang Sushma Swaraj-i, “UN nung kechiba Hindi oshi ya official oshi ka mekümteter, ta aiben tasüngdangba akar. Tanü ni iba ya senden nung lemsatepner- timtem tulutibaji inyakyim lir,” ta ashi.
Iba dak sendakba nung Minister-i, inyakyim nung UN nung züngsem 193 nungi shilem asemsü nungi shilem anatibo, züngsem 129-i Hindi oshi official language atema vote agütsütsüla, ta ashiba den külemi iba inyakyim nung sen teindokbaji lemsateptsüla, ta ashi.
Lai, “Vote agütsütepba dak alia iba nungji senotsü khuret-a densema lir. Asenok pusemba, rongsenkettsüng jenjang mejungi aliba linüktemi iba onük paidoker. Iba atemaji onoki inyakdar. Fiji, Mauritius aser Surinam ama India nunger aliba linüktem teyari agitsü atema onoki merangdar,” ta ashi.
“Kodang asenoki item ama teyari agidir, parnoki senotsü khuret-a lemsateptsü renema lir, ibaji ajanga official language ka akumtsü,” ta laisa ashi.
Laisa, Ato kilonser, Narendra Modi tenati UN nung Hindi oshi agia jembiogo, ta ashi. “Asenok den bendanger tejaokeri English agi jembira asenokia English agi jembir. Parnoki par oshi agi jembira asenokia asen oshi agi jembir. Oshi dak sendakba nung tang External Affairs Ministry-i Hindi atema inyakba amabo kodanga meinyakdang,” ta laisa ashi.
Tamalen UN nung inyakdanga alir aser Congress lenir, Tharoor-i, “Hindi ya national language ka masü, saka official language ka lir. Hindi ajungkettsütsü atema inyakba nung tashishitsü lir. Kechiba asenoki UN nung official language ka nüngdaker? Ibaji kechi nükjidong atema. Atangji Hindi oshi agi jembiner asen Ato kilonser mesüra Foreign Minister ka lir, parnoki aji inyaktettsü akok aser ibaji meyipzüktsütsü atema asenoki sen agütsütsü akok,” ta ashi.