Nagaland-i Assam melenzükogo

Yaküm küm piyong Nagaland nung telok balalai parnok temulung masüba atema aser takhangba balala agüja küm piyong lungkak aitba sentongtem ayonga agia arur tembang. Tang tesüsabuba December ita nunga asenoki lungkak aitba sentong aika ayonga agiba ajangshiogo. Küm tasen tenzükli ano mokdangba sentong tasen ka tenzüka agidar aser taküm-a maneni teloktemi takhangba balala agüja lungkak aittsü südi ta bilemer. Taoba mapang asenoki Assam nung lungkak aitba aser mokdangba inyakyim kanga aliba atema kanga jembia aru, lutsü aser yamaisa bandh asür nah ta asenoki nemnemtepa liasü. Reprangdangra tanü asenoki Assam nung lungkak aitba aser mokdangba inyakyim ajizüka benshir aser Assam melenzükogo. Hao, democracy linük ka nung alir asünung nübortemi temulung masüdang mesüra tebilemba metongtsüdang tejashi sayua lungkak aittsü temeten agüja lir. Ajisüaka iba temeten ya kanga shisa kaa aser jungjunga bilemdanger ang amshitsü tim. Tanü alima kanga dang kara ainba putu ka nung anogo ka mokdangba ajanga takoksa jenti ajurur. Ibaji shishilembartem dang masü saka nübortemi aser oliorartemi ajurur . Ibaji dang masü saka mokdang ayongertemjia pei mapa mesüra wadang toktsür nübo endoker, anibelemer aser ano taküm nung lendong ajurutsüsa tensa ka ajurur. Anungji, pei tejashi sayua lungkak aitdi ta süra, shir dang temulung masür mesüra mepelar parnok dang jagi oa mepelabaji sayutsüla. District mesüra jila mesüra tesem ajunga mokdanger lungkak aittsü melenabo bangdakpur dang jagi oa, parnok office mesüra talidak ki mesüra parnok aliba tesem tonga orr lungkak aitba tajungba asütsü. Nagaland sorkar ketdangsübaren nung metokmeperi aser metongjemi inyakba aika lir aser asenoki bilemdangra, anogoshia lungkak aittsü langa lir. Saka democracy linük ka nung alir asünung aser talisa Khristan lima ka nung senso tajung ka ka asünung, Naga nunger lennirtemi kanga junga shisadanger ang lungkak aitba sentongtem ayonga agitsüla. Mekümdangra iba tangatetba yagi meyiper asenok nem takoksa jenti bener arutsütsü aser asen lima teküpokba jenjangi alutsü. Iba nung Nagaland sorkar tebilemtsü tuluka lir aser ketdangsübaren nung temelenshi alitsüla. Hao, nübortem taginüba mesüra takhangba ajakjibo sorkari magütsütettsü aser metongtsütettsü saka lungkak aittsü indang telemtetba magitsüsa sorkari inyaktsü koka lir aser iba tashiji sorkar ket nung lir. Anungji asenoki Assam nunger lutsüba ama tanga state asoshi asenok menüdong ka makümdang, lungkak aitba aser mokdangba inyakyim ya joko ojang dang südaktsütsü atema sorkar ketdangsübaren kümkümshitsüla aser metokmeperitem ajiteta inyakyim melenshi nüngdaker.