2017 küm US nung lendong balala ajanga sen billion $306 akoksa

Washington, Aenjeti 09 (Agencies): United States nung alima lendong balala ajanga 2017 küm takoksa bener arutsüba ya sen billion $306 jenjang shi lir aser nisung noklang aika taküm sama. Ibai taoba küm dang nungi timba lir.
Iba teraksatsüba ya US otsü nung tatsüktiba kümsembuba mapang ajuru, ta US National Oceanic & Atmospheric Administration (NOAA) ajanga Tentonü (Monday) ashi.
Alimar tzü-mopung ajanga lendong balala bener arutsüba nungb nisung 362 asü aser item rongnung hurricane tulu asem; Harvey, Maria aser Irma lir, ta NOAA-i ashi.
“2017 mapang US nung tzüngsang aser tzü-mopung takoksa otsüsütsüka ajuruogo,” ta tsüngsang-mopung dakzürtemi ashi.
2017 küm US nung iba ama lendong 16 ajuruba nung sen billion $306.2 jenjang akoksaogo, aser iba ajanga taoba mapang otsü yangula 2005 küm sen billion $214.8 aliba ajangogo,” ta ashi.
Hurricane Harvey ajanga Texas nung kongshiba ajanga sen billion $125 jenjang akoksatsü. Harvey ya Hurricane Katrina den adonga lir aser küm 38 otsü nung rongsen timtiba akoksatsü. Hurricane Katrina ajanga sen billion $160 jenjang akoksatsü.
Hurricane Maria aser Irma ajanga sen billion $90 aser billion $50 jenjang akoksatsü.
US nung anülulen aliba state toku nung merok mi adokba ajanga sen billion $18 jenjang akoksatsü aser iba ya taoba mapang yanglua aliba otsü dang nungi asemsü agi tilma liasü.
Iba ama lendong tulu rongnung yipru tesashi aser tzümetsüng tenet densema lir.
United States nung küm 123 nung 2017 ya tatsüktiba küm rongnung asembuba lir, ta NOAA indang National Centers for Environmental Information nung scientist temi ashi.